ന്യൂഡൽഹി: ഓൾ ഇന്ത്യ കൗൺസിൽ ഫോർ ടെക്‌നിക്കൽ എജ്യുക്കേഷൻ ഇന്‍റേൺഷിപ്പ് പോർട്ടലിലൂടെ അടുത്ത മൂന്ന് വർഷത്തിനുള്ളിൽ 100 ദശലക്ഷം അവസരങ്ങൾ ലഭ്യമാക്കാൻ ലക്ഷ്യമിടുന്നതായി കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ. പോര്‍ട്ടലിന്‍റെ ഉദ്‌ഘാടനം നിര്‍വഹിക്കുകയായിരുന്നു അദ്ദേഹം. നിലവില്‍ യുവാക്കൾക്കായി ഒരു ലക്ഷത്തിലധികം അവസരങ്ങളാണ് പോര്‍ട്ടലില്‍ ഒരുക്കിയിട്ടുള്ളത്.
''ഇന്ത്യ സ്വാതന്ത്ര്യത്തിന്‍റെ 100 വർഷം പൂർത്തിയാക്കുന്ന 2047-ലേക്കായി പുതിയ പദ്ധതികള്‍ തയ്യാറാക്കുമ്പോള്‍, യുവാക്കളുടെ തൊഴിലവസരം വർധിപ്പിക്കുന്നതിനും കൂടുതൽ ഉത്പാദനക്ഷമതയുള്ള സമ്പദ്‌വ്യവസ്ഥ കെട്ടിപ്പടുക്കുന്നതിനുമായി അടുത്ത 2-3 വർഷത്തിനുള്ളിൽ 100 ദശലക്ഷം ഇന്‍റേൺഷിപ്പ് അവസരങ്ങൾ നൽകുന്നതിന് നാം ഒരുമിച്ച് പ്രവർത്തിക്കുകയും ലക്ഷ്യമിടുകയും വേണം.'' ധർമേന്ദ്ര പ്രധാൻ ട്വീറ്റ് ചെയ്‌തു.
''യുവജനങ്ങളുടെ ഭാവി സുരക്ഷിതമാക്കുന്നതിന് വ്യവസായത്തെ അക്കാദമിക സ്ഥാപനങ്ങളുമായി ബന്ധിപ്പിക്കുന്നതിന് എന്‍ഇപി-2020 ഊന്നൽ നൽകുന്നു. ഒരു ലക്ഷത്തിലധികം ഇന്‍റേൺഷിപ്പ് അവസരങ്ങൾ സ്വാഗതാർഹമായ തുടക്കമാണ്. എല്ലാവർക്കും ഇന്‍റേൺഷിപ്പ് അവസരങ്ങൾ നൽകുന്നതിനാണ് തങ്ങളുടെ അക്കാദമിക് സ്ഥാപനങ്ങളും വ്യവസായവും ലക്ഷ്യമിടുന്നത്.
ഹ്യുമാനിറ്റീസിലും പുതിയ സാങ്കേതിക വിദ്യകളിലും ഉൾപ്പെടെ ഇന്‍റേൺഷിപ്പ് അവസരങ്ങൾ വൈവിധ്യവത്കരിക്കാൻ കമ്പനികളെയും വ്യവസായത്തെയും പ്രോത്സാഹിപ്പിക്കും.'' ധർമേന്ദ്ര പ്രധാൻ ട്വീറ്റില്‍ വ്യക്തമാക്കി.
