ന്യൂഡല്‍ഹി : രാജ്യതലസ്ഥാനത്ത് ഡെങ്കിപ്പനി മൂലമുള്ള ആറ് മരണങ്ങൾ സ്ഥിരീകരിച്ചതോടെ, ഈ വർഷം രോഗം ബാധിച്ച് മരിച്ചവരുടെ എണ്ണം 23 ആയി ഉയർന്നതായി മുനിസിപ്പൽ റിപ്പോർട്ട്. കഴിഞ്ഞ ഒരാഴ്ചയ്ക്കിടെ 130 പുതിയ കേസുകൾ രേഖപ്പെടുത്തിയതോടെ ഈ വര്‍ഷം 9,500ലധികം പേര്‍ക്കാണ് ഡല്‍ഹിയില്‍ ഡെങ്കിപ്പനി ബാധിച്ചിട്ടുള്ളത്.
ഡിസംബർ 18 വരെ, സൗത്ത് ഡൽഹി മുനിസിപ്പൽ കോർപ്പറേഷന്‍റെ ഔദ്യോഗിക ഡെങ്കി മരണസംഖ്യ 17 ആയിരുന്നു. കോര്‍പ്പറേഷന്‍ തിങ്കളാഴ്‌ച പുറത്തുവിട്ട കണക്ക് പ്രകാരം ഡിസംബര്‍ 25 വരെ 9,545 പേര്‍ക്ക് രോഗം സ്ഥിരീകരിച്ചിട്ടുണ്ട്. ഈ മാസം 25ാം തിയതി വരെ 1,269 കേസുകളാണ് റിപ്പോർട്ട് ചെയ്തത്.
also read: അംബാല-ഡൽഹി ഹൈവേയിൽ ടൂറിസ്റ്റ് ബസുകൾ കൂട്ടിയിടിച്ച് 5 പേർ കൊല്ലപ്പെട്ടു
അതേസമയം 2020ല്‍ 1,072 പേര്‍ക്ക് രോഗം സ്ഥിരീകരിച്ചിരുന്നു. 2,036 (2019), 2,798 (2018), 4,726 (2017), 4,431 (2016) എന്നിങ്ങനെയാണ് മുന്‍ വര്‍ഷങ്ങളില്‍ റിപ്പോര്‍ട്ട് ചെയ്‌ത ഡെങ്കി കേസുകള്‍.
അതേസമയം 2015ലാണ് രാജ്യതലസ്ഥാനത്ത് ഏറ്റവും കൂടുതല്‍ പേര്‍ക്ക് രോഗം ബാധിച്ചത്. അന്ന് ഒക്ടോബര്‍ മാസത്തില്‍ തന്നെ രോഗബാധിതരുടെ എണ്ണം 10,600 കടന്നിരുന്നു. 1996ന് ശേഷത്തെ ഏറ്റവും ഉയര്‍ന്ന നിരക്കായിരുന്നു ഇത്.
