ന്യൂഡൽഹി: 10 വർഷമായി രാജ്യത്തെ വിവിധയിടങ്ങളില്‍ ഒളിവില്‍ കഴിഞ്ഞിരുന്ന പാകിസ്ഥാന്‍ സ്വദേശിയായ ഐ.എസ് ഭീകരന്‍ അലി എന്ന മുഹമ്മദ് അഷ്റഫ് പിടിയില്‍. ഡല്‍ഹിയില്‍ ആക്രമണം നടത്താന്‍ പദ്ധതിയിടുന്നതിനിടെ രാജ്യതലസ്ഥാനത്തെ ലക്ഷ്‌മി നഗര്‍ രമേശ് പാർക്കിൽ നിന്നാണ് ഇയാള്‍ അറസ്റ്റിലായത്.
പ്രതിയെ 14 ദിവസത്തെ പൊലീസ് കസ്റ്റഡിയിൽ വിട്ടു. പാകിസ്ഥാനിലെ പഞ്ചാബില്‍ നിന്നുള്ള ഇയാള്‍, ഐ.എസിന്‍റെ നിർദേശപ്രകാരം ആക്രമണം നടത്താന്‍ പദ്ധതിയിട്ട് വരുന്നതിനിടെയിലാണ് അധികൃതര്‍ക്ക് രഹസ്യ വിവരം ലഭിച്ചത്. തുടര്‍ന്ന്, ഡൽഹി പൊലീസിന്‍റെ പ്രത്യേക സെല്‍ നടത്തിയ ഓപറേഷനില്‍ വലയിലാവുകയായിരുന്നു. അത്യാധുനിക ആയുധങ്ങളായ എ.കെ 47, ഗ്രനേഡുകൾ, വ്യാജ ഇന്ത്യൻ തിരിച്ചറിയല്‍ കാര്‍ഡുകള്‍ എന്നിവയും പ്രതിയില്‍ നിന്നും കണ്ടെടുത്തു.
ഡൽഹി പൊലീസ് കമ്മിഷണർ രാകേഷ് അസ്‌താനയുടെ നേതൃത്വത്തിലാണ് തെരച്ചില്‍ നടന്നത്. അജ്‌മീര്‍, ഡൽഹി, വൈശാലി, ഉദ്ദംനഗർ തുടങ്ങിയ രാജ്യത്തിന്‍റെ വിവിധ ഭാഗങ്ങളിൽ, തീവ്രവാദിയായ അഷ്റഫ് ഒളിത്താവളമായി ഉപയോഗിച്ചുവെന്ന് സ്പെഷ്യൽ സെൽ ഡി.സി.പി പ്രമോദ് കുശ്വാഹ പറഞ്ഞു.
ഡൽഹിയില്‍ ഭീകരാക്രമണ പദ്ധതിയെക്കുറിച്ച് ഞങ്ങൾക്ക് സൂചന ലഭിച്ചു. രഹസ്യവിവരത്തെ തുടർന്ന്, സ്പെഷ്യൽ സെൽ തിങ്കളാഴ്ച രാത്രി ലക്ഷ്‌മി നഗറിൽ നിന്ന് അഷ്റഫിനെ അറസ്റ്റ് ചെയ്‌തു.
ഇന്ത്യയിലെത്തിയത് 2014 ൽ, ബംഗ്ലാദേശ് വഴി
ആയുധങ്ങളും സ്ഥലത്തു നിന്ന് കണ്ടെടുത്തുവെന്ന് ഡി.സി.പി പറഞ്ഞു. വൈശാലിയിൽ നിന്ന് പ്രതി ഒരു പെൺകുട്ടിയെ വിവാഹം കഴിച്ചിരുന്നുവെങ്കിലും പിന്നീട് വേർപിരിഞ്ഞു. വർഷങ്ങളായി ഇയാള്‍ തീവ്രവാദ പ്രവർത്തനങ്ങളിൽ ഏർപ്പെട്ടുവരികയാണ്. ജമ്മു കശ്‌മീരില്‍ സംശയാസ്‌പദമായ തരത്തില്‍ ആളുകളെ സന്ദര്‍ശിച്ചിട്ടുണ്ട്.
നസീര്‍ എന്നുപേരുള്ള ആളാണ് ഇയാള്‍ക്ക് ആക്രമണത്തിനുള്ള പദ്ധതിയുടെ ചുമതല നല്‍കിയതും ആയുധങ്ങൾ വിതരണം ചെയ്‌തതും. 2014 ൽ ബംഗ്ലാദേശ് വഴിയാണ് രാജ്യത്തെത്തിയത്. പാകിസ്ഥാനിൽ നിന്നുള്ള ഐ.എസ് ഏജന്‍റുമാരാണ് ഇയാളെ രാജ്യത്തേക്ക് അയച്ചതെന്നും പ്രതി മൊഴി നല്‍കിയതായി സ്പെഷ്യൽ സെൽ ഡി.സി.പി പ്രമോദ് കുശ്വാഹ പറഞ്ഞു.
വ്യാജ രേഖകളിൽ ഇയാൾ ദുബായ് സന്ദർശിച്ചിരുന്നു. പാകിസ്ഥാന്‍ ഉദ്യോഗസ്ഥനായ നസീറിൽ നിന്ന് പരിശീലനം നേടി, ബിഹാറിലെ വ്യാജ വിലാസമുള്ള പാസ്‌പോർട്ടിൽ 2014 ൽ ഇന്ത്യയിലെത്തിയത്. ഇയാളുടെ കൂട്ടാളികളെ കണ്ടെത്തുന്നതിനായി പൊലീസ് അന്വേഷണം ഊര്‍ജിതമാക്കി.
ALSO READ: ദമ്പതികൾ നടത്തുന്ന വേശ്യാലയത്തിൽ നിന്ന് 17കാരിയെ രക്ഷിച്ചു; മൂന്നുപേർ അറസ്റ്റിൽ
