ഹൈദരാബാദ്: ഡൽഹി മദ്യനയ അഴിമതിക്കേസിൽ ഹൈദരാബാദിലെ വിവിധയിടങ്ങളിൽ എൻഫോഴ്സ്മെന്റ് ഡയറക്‌ടറേറ്റ് റെയ്‌ഡ്. വ്യവസായിയും മുൻ മന്ത്രിയുമായ മുട്ട ഗോപാലകൃഷ്‌ണന്‍റെ ഹൈദരാബാദിലെ ഓഫിസിലും വസതിയിലുമടക്കമാണ് റെയ്‌ഡ് നടന്നത്.
മുട്ട ഗോപാലകൃഷ്‌ണന്‍റെ ജൂബിലി ഹിൽസിലെ ഓഫിസിലും ഗച്ചിബൗളിയിലെ വസതിയിലും നടന്ന റെയ്‌ഡിൽ മദ്യനയ അഴിമതിക്കേസിലെ പ്രതികൾ മുട്ട ഗോപാലകൃഷ്‌ണയുടെ ഉടമസ്ഥതയിലുള്ള തെലുങ്ക് വാർത്ത ചാനലിൽ നിക്ഷേപം നടത്തിയതിന്‍റെ തെളിവുകൾ ഇഡി ഉദ്യോഗസ്ഥർ ശേഖരിച്ചതായാണ് വിവരം. വെള്ളിയാഴ്‌ച(ഒക്‌ടോബര്‍ 7) പുലർച്ചെയാണ് റെയ്‌ഡ് നടന്നതെന്ന് ഇഡി സെൻട്രൽ ഓഫിസ് അറിയിച്ചു. നാല് സംഘങ്ങളാണ് ഹൈദരാബാദിലെ വിവിധ പ്രദേശങ്ങളിൽ നടന്ന റെയ്‌ഡിൽ പങ്കെടുത്തത്.
