ന്യൂഡൽഹി: കൊവിഡ് രോഗികൾക്കായി 33 സ്വകാര്യ ആശുപത്രികളിലെ 80 ശതമാനം ഐസിയു കിടക്കകൾ സംവരണം ചെയ്യണമെന്ന ഡൽഹി സർക്കാരിന്‍റെ ഉത്തരവിനെതിരെ സിംഗിൾ ജഡ്‌ജി ബെഞ്ച് ചുമത്തിയ സ്റ്റേ ഡൽഹി ഹൈക്കോടതി ഒഴിവാക്കി. രാജ്യ തലസ്ഥാനത്ത് കൊവിഡ് ബാധിതർ വർദ്ധിക്കുന്നതായി നിരീക്ഷിച്ച് ജസ്റ്റിസ് ഹിമാ കോഹ്‌ലി, ജസ്റ്റിസ് സുബ്രമോണിയം പ്രസാദ് എന്നിവരടങ്ങിയ ഡിവിഷൻ ബെഞ്ചാണ് ഉത്തരവ് പുറപ്പെടുവിച്ചത്.
എന്നാലും, കിടക്ക ലഭ്യമാകുമ്പോൾ ആരോഗ്യ അടിയന്തരാവസ്ഥയിലുള്ള ആരെയും കഷ്‌ടപ്പെടുത്താൻ അനുവദിക്കില്ലെന്ന് ബെഞ്ച് വ്യക്തമാക്കി. ഈ ആശുപത്രികളിൽ നോഡൽ ഓഫീസർമാർക്ക് ഇളവ് നൽകാമെന്നും കോടതി നിർദേശിച്ചു. തെരഞ്ഞെടുത്ത ആശുപത്രികളിലെ കൊവിഡ് രോഗികൾക്ക് 80 ശതമാനം ഐസിയു കിടക്കകളുടെ സംവരണം സംബന്ധിച്ച ഡൽഹി സർക്കാർ തീരുമാനം നവംബർ 26 വരെ തുടരണമെന്ന് ഡിവിഷൻ ബെഞ്ച് നിർദേശം നൽകി. സിംഗിൾ ജഡ്‌ജിയുടെ മുമ്പാകെ മെറ്റീരിയൽ വിവരങ്ങളെക്കുറിച്ച് ഒരു സത്യവാങ്മൂലം കൂടി സമർപ്പിക്കാനും കോടതി നിർദേശിച്ചു.
കൊവിഡ് രോഗികൾക്ക് 80 ശതമാനം ഐസിയു കിടക്കകൾ സംവരണം ചെയ്യുന്നതിനായി 33 സ്വകാര്യ ആശുപത്രികളെ പ്രത്യേകമായി തെരഞ്ഞെടുത്തതിന് പിന്നിലെ യുക്തി എന്താണെന്ന് ബെഞ്ച് ചോദിച്ചിരുന്നു. ഇക്കാര്യത്തിൽ നിർദേശങ്ങൾ സ്വീകരിക്കാൻ അഡീഷണൽ സോളിസിറ്റർ ജനറൽ സഞ്ജയ് ജെയിനോട് ആവശ്യപ്പെട്ടു.
നിലവിലെ സാഹചര്യത്തിൽ തെരഞ്ഞെടുക്കപ്പെട്ട 33 ആശുപത്രികളിൽ കൊവിഡ് രോഗികൾക്ക് 80 ശതമാനം ഐസിയു കിടക്കകൾ നീക്കിവയ്ക്കാൻ രണ്ടാഴ്‌ചത്തേക്ക് അധികാരം നൽകണമെന്ന് ജെയിൻ കോടതിയോട് ആവശ്യപ്പെട്ടു. കൂടുതൽ നടപടികൾ സ്വീകരിച്ചുവരികയാണെന്നും സ്വകാര്യ ആശുപത്രികൾ കൊവിഡ് രോഗികൾക്ക് പ്രവേശനം നിഷേധിക്കില്ലെന്നും ജെയ്ൻ പറഞ്ഞു. ശേഷിക്കുന്ന ആശുപത്രികളേക്കാൾ ഐസിയു കിടക്കകളുടെ ലഭ്യത തെരഞ്ഞെടുക്കപ്പെട്ട 33 ആശുപത്രികളിലുണ്ടെന്നും അദ്ദേഹം വ്യക്തമാക്കി. 2,217 കിടക്കകളാണ് ഈ ആശുപത്രികളിൽ ഉള്ളത്. ഭൂരിഭാഗം ആളുകളും മാക്‌സ്, ഗംഗാരം, അപ്പോളോ ഹോസ്‌പിറ്റലുകൾ എന്നിവ ഇഷ്‌ടപ്പെടുന്നതിനാൽ ഈ 33 ആശുപത്രികളാണ് ജനങ്ങൾക്കും ഇഷ്‌ടമെന്ന് ജെയ്ൻ കോടതിയെ അറിയിച്ചു.
അസോസിയേഷൻ ഓഫ് ഹെൽത്ത് കെയർ പ്രൊവൈഡേഴ്‌സിനെ പ്രതിനിധീകരിച്ച് മുതിർന്ന അഭിഭാഷകൻ മനീന്ദർ സിംഗ് ഇതിനോട് എതിർപ്പ് പ്രകടിപ്പിക്കുകയും അത് അനുവദിക്കാൻ കഴിയില്ലെന്ന് പറയുകയും ചെയ്‌തു. കൊവിഡ് രോഗികൾക്ക് 60-70 ശതമാനം കിടക്കകൾ നൽകുമ്പോൾ സ്വകാര്യ ആശുപത്രികളിൽ ഗുരുതരമായ കൊവിഡ് ഇതര രോഗികൾക്ക് ഐസിയു കിടക്കകൾ നിഷേധിക്കാൻ കഴിയില്ലെന്നും അദ്ദേഹം കോടതിയെ അറിയിച്ചു.
അസോസിയേഷൻ ഓഫ് ഹെൽത്ത് കെയർ പ്രൊവൈഡേഴ്‌സ് ഇന്ത്യ സമർപ്പിച്ച ഹർജി പരിഗണിച്ചുകൊണ്ട് കൊവിഡ് രോഗികൾക്കായി 80 ശതമാനം ഐസിയു കിടക്കകൾ റിസർവ് ചെയ്യണമെന്ന ഡൽഹി സർക്കാർ നിർദേശം നൽകിയ ഉത്തരവ് നേരത്തെ സിംഗിൾ ജഡ്‌ജി ബെഞ്ച് സ്റ്റേ ചെയ്‌തിരുന്നു.
