ന്യൂഡൽഹി : കോണ്‍ഗ്രസ് നേതാക്കളായ സോണിയ ഗാന്ധി, രാഹുല്‍ ഗാന്ധി എന്നിവരുമായി ചര്‍ച്ച നടത്തി ബംഗാള്‍ മുഖ്യമന്ത്രി മമത ബാനര്‍ജി. 2024 ല്‍ ലോക്‌സഭ തെരഞ്ഞെടുപ്പ് വരാനിരിക്കുന്ന സാഹചര്യത്തില്‍ ബി.ജെ.പിയ്ക്കെതിരായ ദേശീയ തല പ്രതിപക്ഷ സഖ്യനീക്കത്തിന്‍റെ ഭാഗമായാണ് സന്ദര്‍ശനം. ബുധനാഴ്ച വൈകുന്നേരം നാല് മണിയ്ക്ക് സോണിയ ഗാന്ധിയുടെ വസതിയിലെത്തിയിരുന്നു കൂടിക്കാഴ്ച.
'സഖ്യനീക്കത്തിന് പിന്തുണ'
ചര്‍ച്ച ഫലപ്രദമെന്നും ബി.ജെ.പിയെ അധികാരത്തില്‍ നിന്ന് അകറ്റുമെന്നും മമത പറഞ്ഞു. സഖ്യത്തെ ആരുനയിച്ചാലും പ്രശ്നമില്ലെന്ന നിലപാടിലാണ് ബംഗാള്‍ മുഖ്യമന്ത്രി. രാഹുല്‍ ഗാന്ധിയും കൂടിക്കാഴ്ചയില്‍ പങ്കെടുത്തിരുന്നു. സഖ്യനീക്കത്തിന് ഇരുവരും പിന്തുണ അറിയിച്ചെന്നും കൂടുതല്‍ ചര്‍ച്ചകളിലേക്ക് കടക്കാമെന്നാണ് നിലപാടെന്നുമാണ് വിവരം.
"സോണിയ ജി എന്നെ ചായയ്ക്ക് ക്ഷണിച്ചു. രാഹുൽജിയും ഉണ്ടായിരുന്നു. ഞങ്ങൾ രാഷ്ട്രീയ സാഹചര്യത്തെക്കുറിച്ചാണ് സംസാരിച്ചത്. രാജ്യത്തെ രാഷ്ട്രീയ സ്ഥിതി, പെഗാസസ്, കൊവിഡ് സാഹചര്യം എന്നിവ ചർച്ച ചെയ്തു.
പ്രതിപക്ഷത്തിന്‍റെ ഐക്യത്തെക്കുറിച്ചും ചർച്ച ചെയ്തു. വളരെ നല്ലൊരു കൂടിക്കാഴ്‌ചയാണ് നടന്നത്. നല്ല ഫലം വരുമെന്ന് ഞാൻ കരുതുന്നു''. മമത ബാനര്‍ജി മാധ്യമങ്ങളോട് പറഞ്ഞു.
'നേതാവല്ല, തെരുവിൽ നിന്നുള്ളയാള്‍'
"ബി.ജെ.പിയെ പരാജയപ്പെടുത്താൻ എല്ലാവരും ഒത്തുചേരേണ്ടത് അത്യാവശ്യമാണ്. ഒറ്റയ്ക്ക്, ഞാൻ ഒന്നുമല്ല. എല്ലാവരും ഒരുമിച്ച് പ്രവർത്തിക്കേണ്ടിവരും. ഞാൻ ഒരു നേതാവല്ല, ഒരു കേഡറാണ്, തെരുവിൽ നിന്നുള്ളയാളാണ്''. മമത വ്യക്തമാക്കി.
ബംഗാൾ നിയമസഭ തെരഞ്ഞെടുപ്പിൽ വിജയിച്ചതിന് ശേഷം ആദ്യമായി ദേശീയ തലസ്ഥാനത്തെത്തിയ അവര്‍ കഴിഞ്ഞ ദിവസം പ്രധാനമന്ത്രിയെ കണ്ടിരുന്നു. പിന്നാലെയാണ് കോണ്‍ഗ്രസ് നേതാക്കളെ സന്ദര്‍ശിച്ചത്.
ALSO READ: അഫ്‌ഗാന്‍ ഹാസ്യതാരം കൊല്ലപ്പെട്ട നിലയില്‍ ; പിന്നില്‍ താലിബാനെന്ന് കുടുംബം
