ഗുവാഹത്തി: സുരക്ഷ പരിശോധനയ്ക്കിടെ വികലാംഗയായ തന്‍റെ അമ്മയെ വസ്‌ത്രമഴിക്കാൻ നിർബന്ധിപ്പിച്ചുവെന്ന ആരോപണവുമായി പ്രശസ്‌ത നരവംശ ശാസ്ത്രജ്ഞയും എഴുത്തുകാരിയുമായ ഡോളി കിക്കോൺ. ഗുവാഹത്തിയിലെ ലോക്‌പ്രിയ ഗോപിനാഥ് ബോർഡോലോയ് ഇന്‍റർനാഷണൽ വിമാനത്താവളത്തിലെ പതിവ് പരിശോധനയ്ക്കിടെ നടന്ന സംഭവത്തിലാണ് സെൻട്രൽ ഇൻഡസ്‌ട്രിയൽ സെക്യൂരിറ്റി ഫോഴ്‌സ് ഉദ്യോഗസ്ഥനെതിരെ (CISF) ആരോപണമുയർന്നത്.
80കാരിയായ അമ്മയ്‌ക്ക് നീതി ആവശ്യപ്പെട്ട് ഡോളി കിക്കോൺ ട്വിറ്ററിലൂടെ വെളിപ്പെടുത്തിയതോടെയാണ് സംഭവം പുറംലോകമറിയുന്നത്. തന്‍റെ അമ്മയ്‌ക്ക് ടൈറ്റാനിയം ഹിപ് ഇംപ്ലാന്‍റ് ചെയ്‌തതിന്‍റെ തെളിവ് കാണിക്കണമെന്ന് ആവശ്യപ്പെട്ടാണ് ഉദ്യോഗസ്ഥൻ വസ്‌ത്രമഴിക്കാൻ നിർബന്ധിപ്പിച്ചത്. വയോജനങ്ങളോട് അത്തരത്തിലാണോ പെരുമാറേണ്ടതെന്നും കിക്കോൺ ചോദിച്ചു.
അമ്മയെ പരിചരിക്കുന്ന തന്‍റെ സഹോദരിയോടും സിഐഎസ്‌എഫ് ഉദ്യോഗസ്ഥർ മോശമായി പെരുമാറിയതായി അവർ കൂട്ടിച്ചേർത്തു. സഹോദരി എഴുതിയ പരാതിയും ഉദ്യോഗസ്ഥർ പിടിച്ചുവാങ്ങി. പരാതിയുടെ സ്‌ക്രീൻഷോട്ട് എടുക്കാൻ അവർ അവളെ അനുവദിച്ചില്ല.
അമ്മയുടെ അടിവസ്ത്രങ്ങൾ ഊരാൻ നിർബന്ധിച്ചതായും കിക്കോൺ ആരോപിച്ചു. അതേസമയം ഡോളി കിക്കോണിന്‍റെ ട്വീറ്റിന് മറുപടി നൽകിയ സിവിൽ ഏവിയേഷൻ മന്ത്രി ജ്യോതിരാദിത്യ സിന്ധ്യ, ഇക്കാര്യം പരിശോധിക്കുമെന്ന് ഉറപ്പുനൽകി.
ALSO READ:പൊലീസ് സുരക്ഷ വേണമെന്ന് ഏജൻസി: എറണാകുളത്ത് സില്‍വര്‍ ലൈൻ സര്‍വെ നി‍ർത്തി
