ന്യൂഡൽഹി : ബിജെപി നേതാവും മുൻ മുഖ്യമന്ത്രിയുമായ രാമന്‍ സിംഗിനും പാർട്ടി വക്താവ് സംബിത് പത്രയ്ക്കും എതിരെയുള്ള എഫ്‌ഐആർ സ്റ്റേ ചെയ്ത് ഛത്തീസ്ഗഡ് ഹൈക്കോടതി.
ഛത്തീസ്ഗഡ് നാഷണൽ സ്റ്റുഡന്‍റസ് യൂണിയൻ ഓഫ് ഇന്ത്യ ഘടകമാണ് സിംഗ്, പത്ര എന്നിവർക്കെതിരെ വ്യാജ ടൂൾകിറ്റ് ആരോപണവുമായി ബന്ധപ്പെട്ട് റായ്‌പൂരിലെ സിവിൽ ലൈൻസ് പൊലീസ് സ്റ്റേഷനിൽ പരാതി നല്‍കിയത്.
ലോകാരോഗ്യ സംഘടനയുടെ നിർദേശങ്ങള്‍ക്ക് വിരുദ്ധമായി പുതിയ കൊവിഡ് വകഭേദത്തെ 'ഇന്ത്യന്‍ വകഭേദം' അല്ലെങ്കിൽ 'മോദി വകഭേദം' എന്ന് വിളിക്കാൻ കോൺഗ്രസിന്‍റെ സോഷ്യൽ മീഡിയ വളണ്ടിയര്‍മാര്‍ക്ക് ടൂൾകിറ്റിൽ നിർദേശമുണ്ടെന്ന് മെയ് 18 ന് മാധ്യമങ്ങളെ അഭിസംബോധന ചെയ്ത് പത്ര ആരോപിച്ചിരുന്നു.
ആരോപണം നിഷേധിച്ച കോൺഗ്രസ് പത്രയ്‌ക്കെതിരെ ഡല്‍ഹി പൊലീസ് കമ്മിഷണർക്ക് പരാതി നല്‍കി. സാമുദായിക ഭിന്നതയും അശാന്തിയും സൃഷ്ടിക്കുന്നതിനും നിലവിലെ രോഗവ്യാപനത്തിൽ ജനങ്ങൾക്കാവശ്യമായ സഹായം നൽകുന്നതിൽ മോദി സർക്കാർ പരാജയപ്പെടുന്നതിൽ നിന്ന് ശ്രദ്ധ തിരിക്കുന്നതിനുമാണ് ആരോപണമെന്ന് പരാതിയില്‍ ചൂണ്ടിക്കാട്ടിയിരുന്നു.
Also read: കേന്ദ്ര മന്ത്രിസഭ പുനസംഘടന ; സിന്ധ്യ മന്ത്രിയായേക്കും
#CongressToolkitExposed എന്ന ഹാഷ്‌ടാഗ് ഉപയോഗിച്ച് സോഷ്യൽ മീഡിയയിൽ ബിജെപി നേതാക്കൾ നടത്തിയ പ്രചാരണത്തിനെതിരെയാണ് കോണ്‍ഗ്രസ് നിയമനടപടി സ്വീകരിച്ചത്. ടൂള്‍കിറ്റ് വ്യാജമാണെന്ന് ട്വിറ്റര്‍ പിന്നീട് കണ്ടെത്തി വ്യക്തമാക്കിയിരുന്നു.
