ന്യൂഡൽഹി : ഇന്ത്യയുടെ ചാന്ദ്ര ദൗത്യത്തിന്‍റെ അടുത്ത ഘട്ടമായ ചാന്ദ്രയാൻ-3 ഉൾപ്പടെ ബഹിരാകാശ വകുപ്പ് ഈ വർഷം 19 ദൗത്യങ്ങൾ ആസൂത്രണം ചെയ്തിട്ടുണ്ടെന്ന് കേന്ദ്രമന്ത്രി ഡോ. ജിതേന്ദ്ര സിങ് ലോക്‌സഭയിൽ. ചാന്ദ്രയാൻ-2ൽ നിന്നുള്ള പഠനങ്ങളുടെയും ദേശീയ തലത്തിലുള്ള വിദഗ്‌ധരുടെ നിർദേശങ്ങളുടെയും അടിസ്ഥാനത്തിൽ ചാന്ദ്രയാൻ-3ന്‍റെ തയാറെടുപ്പ് പുരോഗമിക്കുകയാണ്.
ദൗത്യത്തിനാവശ്യമായ അനുബന്ധ ഉപകരണങ്ങളുടെ പ്രത്യേക പരിശോധനകൾ വിജയകരമായി പൂർത്തിയാക്കി. വിക്ഷേപണം ഓഗസ്റ്റിൽ ഉണ്ടാകുമെന്നും മന്ത്രി അറിയിച്ചു. എട്ട് 'ലോഞ്ച് വെഹിക്കിൾ മിഷനുകൾ', ഏഴ് 'സ്‌പേസ് ക്രാഫ്റ്റ് മിഷനുകൾ', നാല് 'ടെക്‌നോളജി ഡെമോൺസ്‌ട്രേറ്റർ മിഷനുകൾ' എന്നിവയുൾപ്പടെ ഈ വർഷം ആകെ 19 ദൗത്യങ്ങളാണ് രാജ്യം ആസൂത്രണം ചെയ്തിട്ടുള്ളത്.
Also Read: ഐ.എസ് തലവന്‍ ഹാഷിമി അൽ ഖുറൈഷിയെ വധിച്ചെന്ന് അമേരിക്ക
കൊവിഡ് നിരവധി ദൗത്യങ്ങളെ ബാധിച്ചു. ബഹിരാകാശ മേഖലയിലെ പരിഷ്‌കാരങ്ങളുടെയും പുതുതായി അവതരിപ്പിച്ച മോഡലുകളുടെയും പശ്ചാത്തലത്തിൽ പദ്ധതികളുടെ പുനഃക്രമീകരണം നടന്നിട്ടുണ്ടെന്ന് ഡോ. ജിതേന്ദ്ര സിങ് അറിയിച്ചു. ഗഗൻയാൻ, ആദിത്യ സോളാർ മിഷൻ തുടങ്ങിയ പ്രധാന പദ്ധതികളും അണിയറയിൽ ഒരുങ്ങുന്നുണ്ട്.
