ബെംഗളൂരു : കാവേരി നദീജലം തമിഴ്‌നാടിന് വിട്ടുകൊടുക്കുന്നതിൽ പ്രതിഷേധിച്ച് കന്നഡ അനുകൂല സംഘടനകൾ നാളെ കർണാടകയിൽ ബന്ദ് ആചരിക്കും. (Cauvery Water Dispute). കന്നഡ അനുകൂല സംഘടനാപ്രവർത്തകരായ വട്ടാൽ നാഗരാജ്, സാറാ ഗോവിന്ദു, പ്രവീൺ ഷെട്ടി തുടങ്ങിയവരുടെ നേതൃത്വത്തിൽ വിവിധ സംഘടനകളാണ് കർണാടക ബന്ദ് ആഹ്വാനം ചെയ്‌തിരിക്കുന്നത്. കൂടാതെ ചില സംഘടനകള്‍ ധാർമിക പിന്തുണ അറിയിച്ചിട്ടുമുണ്ട്(Pro Kannada Group Call For Karnataka Bandh).
ജലസംരക്ഷണ സമിതിയുടെ നേതൃത്വത്തിൽ കർഷക അനുകൂല സംഘടനകളും ദളിത് സംഘടനകളും ഉൾപ്പടെ ഇരുന്നൂറിലധികം പ്രസ്ഥാനങ്ങള്‍ ഇക്കഴിഞ്ഞ ചൊവ്വാഴ്‌ച ബെംഗളൂരുവിൽ ബന്ദ് നടത്തിയിരുന്നു. ബുധനാഴ്‌ച തുറന്ന വാഹനത്തിൽ റാലി നടത്തിയ വട്ടാൽ നാഗരാജുവും മറ്റ് പ്രവർത്തകരും ഹോട്ടലുകൾ, ഷോപ്പിംഗ് മാളുകള്‍, കട ഉടമകൾ എന്നിവരോട് ബന്ദുമായി സഹകരിക്കാൻ അഭ്യർഥിച്ചിരുന്നു. ടൗൺഹാൾ മുതൽ ഫ്രീഡം പാർക്ക് വരെ നാളെ പ്രതിഷേധ റാലി നടത്തുമെന്നും ഇത് തടയരുതെന്ന് സർക്കാരിനോട് അഭ്യർഥിച്ചിട്ടുണ്ടെന്നും നേതാക്കൾ പറഞ്ഞു.
പിന്തുണച്ച് വിവിധ സംഘടനകൾ : കന്നഡ സിനിമ വ്യവസായത്തിന്‍റെ എല്ലാ പ്രവർത്തനങ്ങളും താത്‌കാലികമായി നിർത്തിവയ്ക്കുമെന്നും പ്രതിഷേധ റാലിയിൽ പങ്കെടുക്കാൻ അഭിനേതാക്കളോട് അഭ്യർഥിച്ചിട്ടുണ്ടെന്നും കന്നഡ ഫിലിം ചേംബർ ഓഫ് കൊമേഴ്‌സ് അറിയിച്ചു.
സംസ്ഥാനത്തെ ദുരിതപൂർണമായ സാഹചര്യം ബോധ്യപ്പെടുത്തുന്നതിനും ശരിയായ നീതി ലഭ്യമാക്കുന്നതിനും വേണ്ടി കന്നഡ അനുകൂല സംഘടനകളും, കർഷക അനുകൂല സംഘടനകളും ആഹ്വാനം ചെയ്‌ത ബന്ദിന് ബെംഗളൂരു നഗർ ജില്ല കന്നഡ സാഹിത്യ പരിഷത്ത് പൂർണ പിന്തുണ പ്രഖ്യാപിച്ചിട്ടുണ്ട്.
സ്‌കൂളുകൾക്കും കോളജുകൾക്കും അവധി നൽകുന്നത് സംബന്ധിച്ച് അതത് ജില്ല കമ്മിഷണർമാരുടെ നേതൃത്വത്തിൽ തീരുമാനം എടുക്കുന്നതാണ് ഉചിതമെന്ന് സ്വകാര്യ സ്‌കൂളുകൾ അറിയിച്ചു. അതേസമയം സർക്കാർ സ്‌കൂളുകൾക്കും കോളജുകൾക്കും അവധിയില്ല.
ബിഎംടിസി എംപ്ലോയീസ് യൂണിയൻ ബന്ദിന് പിന്തുണ നൽകുമെങ്കിലും ബസ് സർവീസ് പതിവുപോലെ തുടരും. 48,000 ടാക്‌സികളും 1.25 ലക്ഷം ഓട്ടോകളും നിർത്തിവയ്ക്കുമെന്നും ബന്ദിന് പൂർണ പിന്തുണ നൽകുമെന്നും ഓല ഊബർ അസോസിയേഷൻ പ്രസിഡന്‍റ്‌ തൻവീർ പാഷ അറിയിച്ചു.
വഴിയോര കച്ചവടക്കാരും ബന്ദിന് പൂർണ പിന്തുണ പ്രഖ്യാപിച്ചിട്ടുണ്ട്. നാളെ രാവിലെ 6 മുതൽ വൈകിട്ട് 6 വരെ സംസ്ഥാനത്തുടനീളം വഴിയോര കച്ചവടക്കാരുടെയും ലോക്കൽ മാർക്കറ്റ് കച്ചവടക്കാരുടെയും സമ്പൂർണ ഉപരോധം ഉണ്ടാകുമെന്ന് ഫെഡറേഷൻ ഓഫ് കർണാടക സ്ട്രീറ്റ് വെന്‍ഡേഴ്‌സ് ഓർഗനൈസേഷൻസ് സംസ്ഥാന പ്രസിഡന്‍റ്‌ രംഗസ്വാമി അറിയിച്ചു.
ബെംഗളൂരുവിൽ സെക്ഷൻ 144 : കർണാടകയിൽ നാളെ ബന്ദിന് ആഹ്വാനം ചെയ്‌തിരിക്കുന്നതിനാൽ ബെംഗളൂരുവിൽ കർഫ്യൂ ആസൂത്രണം ചെയ്‌തതായി പൊലീസ് ഓഫിസർ ബി ദയാനന്ദ് വാർത്താസമ്മേളനത്തിൽ പറഞ്ഞു.
പ്രതിഷേധ മാർച്ചുകളും റാലികളും അനുവദിക്കില്ലെന്നും ബെംഗളൂരുവില്‍ ഇന്ന് രാത്രി 12 മുതൽ നാളെ രാത്രി 12 വരെ സെക്ഷൻ 144 നടപ്പാക്കുമെന്നും അദ്ദേഹം അറിയിച്ചു. ഫ്രീഡം പാർക്കിൽ മാത്രമേ പ്രതിഷേധം അനുവദിക്കുകയുളളൂവെന്നും സംഘടനകൾക്ക് ഇത് സംബന്ധിച്ച് നോട്ടിസ് നൽകിയിട്ടുണ്ടെന്നും അദ്ദേഹം വ്യക്തമാക്കി.
ബന്ദ് ആഹ്വാനത്തിൽ സുപ്രീം കോടതി വ്യക്തമായ നിർദേശം നൽകിയിട്ടുണ്ട്. ബന്ദിനിടെ പൊതുമുതൽ നശിപ്പിച്ചാൽ സംഘാടകർ ഉത്തരവാദികളായിരിക്കുമെന്ന് കോടതി വ്യക്തമാക്കിയിട്ടുണ്ട്.
കെഎസ്ആർപി, സിഎആർ, ഹോം ഗാർഡ് എന്നിവരെ സെൻസിറ്റീവ് മേഖലകളിൽ വിന്യസിക്കുന്നുണ്ട്. മുൻകരുതൽ നടപടിയുടെ ഭാഗമായി ക്രിമിനൽ പശ്ചാത്തലമുള്ളവരെ കസ്‌റ്റഡിയിൽ എടുക്കുമെന്നും പൊലീസ് അറിയിച്ചിട്ടുണ്ട്.
