മുംബൈ: നാസികില്‍ ഓക്സിജന്‍ ചോര്‍ന്ന് 24 പേര്‍ മരണപ്പെട്ട സംഭവത്തില്‍ സ്വമേധയാ കേസെടുത്ത് മുംബൈ ഹൈക്കോടതി. ഇക്കാര്യത്തില്‍ മറുപടി നൽകാൻ കോടതി സംസ്ഥാന സർക്കാരിനോട് ആവശ്യപ്പെട്ടു. മഹാരാഷ്ട്രയിലെ നാസിക് ജില്ലയിലെ ഡോ. സാക്കിർ ഹുസൈൻ ആശുപത്രിയിൽ ബുധനാഴ്ചയാണ് ഓക്സിജൻ ടാങ്കർ ചോര്‍ന്ന് 24 പേര്‍ മരണപ്പെട്ടത്.
അതേസമയം അപകടത്തില്‍ കോര്‍പറേഷന്‍റെ ഭാഗത്ത് പിഴവില്ലെന്നും, കൂടുതല്‍ അന്വേഷണത്തിനായി ഉന്നതതല സമിതി രൂപീകരിച്ചിട്ടുണ്ടെന്നും നാസിക് മേയർ സതീഷ് കുൽക്കർണി പറഞ്ഞു. സ്ഥിതിഗതികൾ നിയന്ത്രണത്തിലാണെന്ന് മഹാരാഷ്ട്ര ആരോഗ്യമന്ത്രി രാജേഷ് ടോപ്പെയും പറഞ്ഞിരുന്നു.
കൂടുതല്‍ വായനയ്ക്ക് : ഓക്സിജന്‍ ടാങ്കര്‍ ചോര്‍ച്ച ; 22 കൊവിഡ് രോഗികള്‍ ശ്വാസംമുട്ടി മരിച്ചു
വളരെ ദൗര്‍ഭാഗ്യകരമായ സംഭവമാണ് നടന്നത്. വിശദമായ അന്വേഷണം നടന്നു വരികയാണ്. ഇതിന് പിന്നില്‍ ആരായാലും നിയമത്തിന് മുന്‍പില്‍ കൊണ്ടുവരുമെന്ന് മഹാരാഷ്ട്ര ഫുഡ് ആൻഡ് ഡ്രഗ് അഡ്മിനിസ്ട്രേഷൻ (എഫ്‌ഡിഎ) മന്ത്രി രാജേന്ദ്ര ഷിംഗാനെ പറഞ്ഞു. മഹാരാഷ്ട്ര മുഖ്യമന്ത്രി ഉദ്ദവ് താക്കറെ മരിച്ചവരുടെ കുടുംബത്തിന് 5 ലക്ഷം രൂപ നഷ്ടപരിഹാരം പ്രഖ്യാപിച്ചിരുന്നു.
