അഹമ്മദാബാദ് : ഏകീകൃത സിവില്‍ കോഡ് പാര്‍ട്ടി ഉയര്‍ത്തുന്ന ദേശീയ പ്രശ്‌നമാണെന്ന് ബിജെപി അധ്യക്ഷന്‍ ജെ.പി നഡ്ഡ. അടുത്തിടെ നടന്ന ഹിമാചല്‍ പ്രദേശ് തെരഞ്ഞെടുപ്പിലും നിലവിലെ ഗുജറാത്ത് പ്രചരണത്തിലും ഏകീകൃത സിവില്‍ കോഡ് (യുസിസി) നടപ്പിലാക്കുമെന്ന വാഗ്‌ദാനം മുന്നോട്ടുവച്ചതിന് പിന്നാലെയാണ് പാര്‍ട്ടി അധ്യക്ഷന്‍റെ പ്രതികരണം. രാജ്യത്തിന്‍റെ സമ്പത്തും ഉത്തരവാദിത്വങ്ങളും എല്ലാവര്‍ക്കും തുല്യമാണെന്നും ഇതിന് യുസിസി സ്വാഗതാര്‍ഹമായ നടപടിയാണെന്നും അദ്ദേഹം പറഞ്ഞു.
യുസിസി എന്ന കവചം : മനുഷ്യ ശരീരത്തിലെ ചീത്ത കോശങ്ങളെ നിരീക്ഷിക്കാന്‍ ആന്‍റിബോഡികള്‍ ഉള്ളതുപോലെ ദേശവിരുദ്ധ കോശങ്ങളെ നിയന്ത്രിക്കേണ്ടത് രാജ്യത്തിന്‍റെ ഉത്തരവാദിത്തമാണ്. അതുകൊണ്ടുതന്നെ രാജ്യത്തിനും സമൂഹത്തിനും എതിരായി പ്രവർത്തിക്കുന്ന ശക്തികളെ നിയന്ത്രിക്കേണ്ടത് രാജ്യത്തിന്‍റെ ഉത്തരവാദിത്തമാണെന്ന് പറഞ്ഞ അദ്ദേഹം കഴിയുന്നത്ര സംസ്ഥാനങ്ങളില്‍ ഏകീകൃത സിവില്‍ കോഡ് നടപ്പിലാക്കാന്‍ ആഗ്രഹിക്കുന്നതായും വ്യക്തമാക്കി.
മുസ്‌ലിങ്ങളെ അവഗണിച്ചോ ? : ഗുജറാത്തില്‍ എന്തുകൊണ്ട് ഒരു മുസ്‌ലിം സ്ഥാനാര്‍ഥിയെ അവതരിപ്പിച്ചില്ല എന്ന വിമര്‍ശനത്തിന് മറുപടി നല്‍കാനും അദ്ദേഹം മറന്നില്ല. തന്‍റെ പാര്‍ട്ടി 'സബ് കാ സാത്ത്, സബ് കാ വികാസ്' ( എല്ലാവര്‍ക്കും ഒപ്പം, എല്ലാവര്‍ക്കും വികസനം) എന്നതിലാണ് വിശ്വസിക്കുന്നത്. അന്തരിച്ച ഡോ.എ.പി.ജെ അബ്‌ദുല്‍ കലാം ഇന്ത്യയുടെ രാഷ്‌ട്രപതിയായത് ബിജെപി പിന്തുണയോടെയാണെന്നും കേന്ദ്രത്തിലുള്ള മോദി സര്‍ക്കാര്‍ മുസ്‌ലിം ഗവര്‍ണര്‍മാരെ നിയമിച്ചിട്ടുണ്ടെന്നും അദ്ദേഹം പറഞ്ഞു. അതുകൊണ്ടുതന്നെ 'സബ് കാ സാത്ത്, സബ് കാ വികാസ്' എന്ന തത്വവും വിജയസാധ്യതയും മാത്രമേ തെരഞ്ഞെടുപ്പിന് സീറ്റ് നല്‍കുന്നതിന് മാനദണ്ഡമായിട്ടുള്ളൂവെന്നും അദ്ദേഹം അറിയിച്ചു.
ഒന്നും 'തള്ളിയിട്ടില്ല' : ഗുജറാത്ത് തെരഞ്ഞെടുപ്പിനുള്ള പ്രകടനപത്രികയിൽ എതിരാളികൾ നിരവധി 'സൗജന്യങ്ങൾ' പ്രഖ്യാപിച്ചപ്പോൾ ബിജെപി അത് ചെയ്‌തിട്ടില്ല. കാരണം ശാക്തീകരണവും ആകര്‍ഷണവും തമ്മില്‍ വ്യത്യാസമുണ്ട്. ഗുജറാത്തിൽ തങ്ങൾ അധികാരത്തിൽ വരില്ലെന്ന് ആം ആദ്മി പാർട്ടിക്കും കോൺഗ്രസിനും അറിയാം. അതുകൊണ്ട് അവര്‍ക്ക് ബജറ്റും ഫണ്ടും പരിഗണിക്കാതെ സൗജന്യങ്ങള്‍ പ്രഖ്യാപിക്കാം. എന്നാല്‍ തങ്ങളുടെ പരിപാടികള്‍ ദരിദ്രരെ ശാക്തീകരിക്കാനുള്ളതാണ്. പക്ഷേ അത് ജനസംഖ്യയിലെ ഒരു വിഭാഗത്തെ മാത്രം ഉദ്ദേശിച്ചുള്ളതല്ലെന്നും നഡ്ഡ വ്യക്തമാക്കി.
ഉറച്ച പ്രതീക്ഷയില്‍ : ഗുജറാത്ത് നിയമസഭ തെരഞ്ഞെടുപ്പില്‍ ബിജെപി വന്‍ വിജയം നേടുമെന്നുള്ള ആത്മവിശ്വാസത്തില്‍ സംസ്ഥാനത്തുടനീളം തെരഞ്ഞെടുപ്പ് റാലികളെയും റോഡ്‌ഷോകളെയും അഭിസംബോധന ചെയ്യുന്ന തിരക്കിലാണ് ജെ.പി നഡ്ഡ. പ്രധാനമന്ത്രി നരേന്ദ്ര മോദി ഗുജറാത്തിലെ ജനങ്ങളുടെ ഹൃദയത്തിലാണെന്നും അവര്‍ ബിജെപിയെ കൈവിടില്ലെന്നുമുള്ള ആത്മവിശ്വാസം അദ്ദേഹം പലതവണ പങ്കുവെച്ചിരുന്നു. ഗുജറാത്തില്‍ ഏഴാം തവണയും ഭരണം നിലനിര്‍ത്തുക എന്ന ലക്ഷ്യമാണ് ബിജെപിക്കുള്ളത്.
അതേസമയം കോണ്‍ഗ്രസിനൊപ്പം എഎപിയും ശക്തമായ വെല്ലുവിളിയാണ് ബിജെപിക്ക് ഉയര്‍ത്തുന്നത്. ഡിസംബര്‍ ഒന്ന്, അഞ്ച് തീയതികളില്‍ രണ്ട് ഘട്ടങ്ങളിലായി നടക്കുന്ന ഗുജറാത്ത് തെരഞ്ഞെടുപ്പിന്‍റെ ഫലം ഡിസംബര്‍ എട്ടിന് പുറത്തുവരും.
