പട്ന: ഇന്ത്യന്‍ രാഷ്ട്രീയം ഉറ്റുനോക്കുന്ന ബിഹാര്‍ തെരഞ്ഞെടുപ്പ് ഫലം അറിയാന്‍ മണിക്കൂറുകള്‍ മാത്രം ബാക്കി. മൂന്ന് ഘട്ടങ്ങളായി തെരഞ്ഞെടുപ്പ് നടന്ന സംസ്ഥാനത്ത് രാവിലെ എട്ടു മുതല്‍ വോട്ടെണ്ണല്‍ ആരംഭിക്കും. 243 സീറ്റുകളുടെ ഫലത്തിനായാണ് കാത്തിരിപ്പ്. എക്സിറ്റ് പോള്‍ ഫലങ്ങളുടെ പിന്‍ബലത്തില്‍ ഏറെ ആത്മവിശ്വാസത്തിലാണ് ആര്‍ജെഡിയുയുടെ മഹാസഖ്യമുള്ളത്. എന്നാല്‍ എക്സിറ്റ് പോളുകളെ തള്ളി സംസ്ഥാനത്ത് വിജയ തുടര്‍ച്ച് പ്രവചിക്കുകയാണ് എന്‍ഡിഎ. മഹാരാഷ്ട്രയിലും ജാർഖണ്ഡിലും ന്യൂഡല്‍ഹിയിലും നഷ്ടപ്പെട്ട പ്രതാപം ബിഹാറിലൂടെ തിരിച്ച് പിടിക്കാനാണ് എന്‍ഡിഎ ശ്രമം. എന്നാല്‍ ബിഹാര്‍ കൈവിട്ടാല്‍ അത് ബിജെപിക്കും പ്രധാനമന്ത്രിക്കും വലിയ രാഷ്ട്രീയ തിരിച്ചടിയാകുമെന്നാണ് രാഷ്ട്രീയ നിരീക്ഷകരുടെ വിലയിരുത്തല്‍. അതിനാല്‍ തന്നെ നിതീഷ് കുമാറിന് നാലാം തുടര്‍ ഭരണത്തില്‍ കുറഞ്ഞൊന്നും എന്‍ഡിഎ പ്രതീക്ഷിക്കുന്നുമില്ല.
31ാം ജന്മദിനം ആഘോഷിക്കുന്ന് തേജസ്വി യാദവ് എന്‍ഡിഎ ക്യാമ്പിന് വെല്ലുവിളി ഉയര്‍ത്തുന്നുണ്ട്. പ്രചാരണങ്ങളില്‍ ജ്വലിച്ച തേജസ്വിയുെട പ്രതീക്ഷകള്‍ക്കൊപ്പമാണ് എക്സിറ്റ് പോള്‍ ഫലങ്ങള്‍. അതേസമയം സംസ്ഥാനത്ത് ഒറ്റക്ക് ഭരണം പിടിക്കാനും ഏറ്റവും വലിയ ഒറ്റകക്ഷിയാകാനുമുള്ള ബിജെപിയുടെ ശ്രമങ്ങളും ബിഹാര്‍ ഫലത്തെ കൂടുതല്‍ ആകാംഷയുള്ളതാക്കും. മത്സരം കടുത്തെങ്കിലും ചിരാഗ് പസ്വാനെയും ചെറിയ പാര്‍ട്ടികളെയും ഒപ്പം നിര്‍ത്താനുള്ള നീക്കങ്ങൾ ബിജെപി തുടങ്ങികഴിഞ്ഞു. അതേസമയം തൂക്കു മന്ത്രിസഭയുടെ സാധ്യതകള്‍ തള്ളാത്ത മുന്നണികള്‍ മറ്റ് പാര്‍ട്ടികളുമായുള്ള ചര്‍ച്ചകള്‍ ഇതിനകം തന്നെ ആരംഭിച്ചു കഴിഞ്ഞു.
കോണ്‍ഗ്രസിന്‍റെ പ്രമുഖ നേതാക്കളെല്ലാ സംസ്ഥാനത്ത് എത്തിയിട്ടുണ്ടെന്നാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. സംസ്ഥാനത്ത് ബിജെപി കുതിര കച്ചവടത്തിന് ശ്രമിക്കുന്നതായും കോണ്‍ഗ്രസ് ആരോപിക്കുന്നു. 38 ജില്ലകളിലായി 55 വോട്ടെണ്ണല്‍ കേന്ദ്രങ്ങളാണ് സജ്ജീകരിച്ചിരിക്കുന്നത്. ഫലം പ്രഖ്യാപനത്തിനായി തെരഞ്ഞെടുപ്പ് കമ്മിഷന്‍ ഒരുക്കങ്ങല്‍ പൂര്‍ത്തിയാക്കി കഴിഞ്ഞു. 243 നിയമസഭാ സീറ്റുകളിലേക്കായി മൂന്ന് ഘട്ടമായാണ് തെരഞ്ഞെടുപ്പ് നടന്നത്. ഒക്ടോബര്‍ 28നായിരുന്നു ആദ്യ ഘട്ട വോട്ടെണ്ണല്‍. നവംബര്‍ മൂന്ന് ഏഴ് തിയതികളിലായി വോട്ടെണ്ണല്‍ പൂര്‍ത്തിയായി. 122 സീറ്റാണ് സംസ്ഥാനത്ത് കേവലഭുരിപക്ഷത്തിനായി വേണ്ടത്. 54.97 ശതമാനം വോട്ടിങ്ങാണ് സംസ്ഥാനത്ത് രേഖപ്പെടുത്തിയത്.
ബിഹാറിനെ കൂടാതെ മധ്യപ്രദേശ്‌, ഉത്തര്‍ പ്രദേശ്, ഗുജറാത്ത്‌, മണിപ്പുർ സംസ്ഥാനങ്ങളിലെ നിയമസഭാ ഉപതെരഞ്ഞെടുപ്പ് ഫലവും ഇന്നറിയാം. കോൺഗ്രസിൽ നിന്ന്‌ എംഎൽഎമാർ കൂട്ടത്തോടെ കൂറുമാറിയതിനെത്തുടർന്ന്‌ 28 നിയമസഭാ മണ്ഡത്തിലേക്കാണ്‌ മധ്യപ്രദേശിൽ ഉപതെഞ്ഞെടുപ്പ്‌. ഗുജറാത്തിൽ എട്ടും യുപിയിൽ ഏഴും മണിപ്പുരിൽ നാലും നിയമസഭാ സീറ്റിലേക്കാണ്‌ ഉപതെരഞ്ഞെടുപ്പ്. ബിഹാറിലെ വൽമീകി നഗർ ലോക്‌സഭാ മണ്ഡലത്തേിലേക്കും തെരഞ്ഞെടുപ്പ് നടന്നു.
