വിശാഖപട്ടണം: ഹൈദരാബാദ് സ്വദേശിയായ യുവതിക്ക് നേരെ അസിഡ് ആക്രമണം. വിശാഖപട്ടണത്തിലെ ഗജുവാക്കയില്‍ ഇന്നലെ വൈകിട്ടാണ് സംഭവം. ഒരു സ്‌ത്രീയാണ് ആക്രമണം നടത്തിയത്. പ്രതിയെ ഇതുവരെ തിരിച്ചറിഞ്ഞിട്ടില്ല.
ഒരു സ്വാകാര്യ ചടങ്ങില്‍ പങ്കെടുക്കുന്നതിനായാണ് സിരിഷ എന്ന യുവതി ഹൈദരാബാദില്‍ നിന്നും വിശാഖപട്ടണത്തിലെത്തിയത്. ചടങ്ങ് കഴിഞ്ഞ് തിരിച്ചുവരുന്നതിനിടെ സാമന്താ നഗര്‍ റോഡില്‍ വച്ചാണ് ആക്രമണം നടന്നത്. പിന്നാലെ സമീപത്തെ സ്വകാര്യ ആശുപത്രിയിലേക്ക് സിരിഷ ഓടിയെത്തുകയായിരുന്നു. ശരീരത്തിന്‍റെ നാല്‍പ്പത് ശതമാനം ഭാഗത്ത് പൊള്ളലേറ്റ യുവതി ചികില്‍സയില്‍ തുടരുകയാണ്.
പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. മൃഗ ഡോക്‌ടറുടെ കൊലപാതകം അടക്കം സംസ്ഥാനത്ത് അടുത്തിടെയായി സ്‌ത്രീകള്‍ക്കെതിരായ അതിക്രമങ്ങളുടെ എണ്ണം വളരെയധികം കൂടുകയാണ്
