ഭോപ്പാല്‍: ഉജ്ജെയിനില്‍ വെച്ച് കുറ്റവാളിയായ വികാസ് ദുബെ പിടിയിലായതോടെ പ്രതിയെ തിരിച്ചറിഞ്ഞ സെക്യൂരിറ്റി ജീവനക്കാരന്‍റെ വീഡിയോ ഇന്‍റര്‍നെറ്റില്‍ പ്രചാരം നേടി. ലഖാന്‍ യാദവാണ് വികാസ് ദുബെയെ ക്ഷേത്രത്തില്‍ വെച്ച് തിരിച്ചറിഞ്ഞത്. ഇയാളുടെ ഫോട്ടോ നേരത്തെ കണ്ടിരുന്നുവെന്നും മഹാകാല്‍ ക്ഷേത്രത്തില്‍ ദര്‍ശനത്തിന് വന്നതാണെന്ന് കരുതിയെങ്കിലും രണ്ട് മണിക്കൂറോളം നിരീക്ഷിച്ചതിന് ശേഷം അധികൃതരെയും പൊലീസിനെയും അറിയിച്ചെന്ന് ലഖാന്‍ യാദവ് പറഞ്ഞു.
രാവിലെ 7 മണിക്കാണ് ഇയാള്‍ ക്ഷേത്രത്തില്‍ ദര്‍ശനത്തിനെത്തിയത്. പിറകിലെ ഗേറ്റു വഴിയാണ് ഇയാള്‍ ക്ഷേത്രത്തില്‍ പ്രവേശിച്ചത്. സെക്യൂരിറ്റി ക്യാമറകളിലും വികാസ് ദുബെയുടെ ദൃശ്യങ്ങള്‍ പതിഞ്ഞിട്ടുണ്ട്. ഇയാളുടെ കൂടെ സഹായികളും ഉണ്ടായിരുന്നുവെന്ന് ലഖാന്‍ യാദവ് കൂട്ടിച്ചേര്‍ത്തു. ക്ഷേത്രത്തില്‍ എട്ടംഗ സെക്യൂരിറ്റി ജീവനക്കാരാണ് ഉണ്ടായിരുന്നതെന്നും ലഖാന്‍ യാദവ് പറഞ്ഞു.
