ചണ്ഡീഗഢ്: പഞ്ചാബിലെ ഇന്ത്യാ-പാക് അതിര്‍ത്തി പ്രദേശമായ ഹുസൈന്‍വാലയില്‍ പാക് ഡ്രോണുകള്‍ കണ്ടെത്തിയതായി സുരക്ഷാ ഉദ്യോഗസ്ഥര്‍. ഡ്രോണുകള്‍ പറക്കുന്ന ചിത്രങ്ങള്‍ ഗ്രാമീണര്‍ ഫോണുകളില്‍ പകര്‍ത്തിയിട്ടുണ്ട്. ഫിറോസ്‌പൂര്‍ ജില്ലയിലെ ടെണ്ടിവാല ഗ്രാമത്തില്‍ തിങ്കളാഴ്‌ച രാവിലെ 8.48 ഓടെ ഡ്രോണുകളെ കണ്ടെത്തിയതായി ഔദ്യോഗികവൃത്തങ്ങള്‍ മാധ്യമങ്ങളോട് പറഞ്ഞു.
കഴിഞ്ഞ വര്‍ഷം ഒക്‌ടോബറില്‍ ഇതേ പ്രദേശത്ത് മൂന്നുതവണ പാക് ഡ്രോണുള്‍ കണ്ടിരുന്നു. ജനുവരി പത്തിന് രണ്ട് ചൈനീസ് നിര്‍മിത ഡ്രോണുകള്‍ പഞ്ചാബ് പൊലീസ് പിടിച്ചെടുത്തിരുന്നു. ഇന്ത്യാ-പാക് അതിര്‍ത്തിയില്‍ ആയുധങ്ങളും മയക്കുമരുന്നും കടത്തുന്ന രണ്ട് പേരെയും ഒരു സൈനികനെയും അറസ്റ്റ് ചെയ്‌തിരുന്നു. ഇന്‍റലിജന്‍സിന്‍റെ നേതൃത്വത്തില്‍ നടന്ന തെരച്ചിലില്‍ ഡ്രോണ്‍ ബാറ്ററികളും ഡ്രോണ്‍ കണ്ടെയ്‌നറും വോക്കി ടോക്കി സെറ്റുകളും 6.22 ലക്ഷം രൂപയും കണ്ടെത്തിയിരുന്നതായി ഡിജിപി ദിനകര്‍ പറഞ്ഞു.
