ന്യൂഡൽഹി: പ്രിയങ്ക ഗാന്ധി വാർദ്രയുടെ വീട്ടിലുണ്ടായ സുരക്ഷാ ലംഘനം യാദൃശ്ചികമല്ലെന്ന് ആഭ്യന്തരമന്ത്രി അമിത് ഷാ. സംഭവത്തിൽ ഉന്നതതല അന്വേഷണത്തിന് ഉത്തരവിട്ടതായും മൂന്ന് പേരെ സസ്പെൻഡ് ചെയ്തതായും സ്പെഷ്യൽ പ്രൊട്ടക്ഷൻ ഗ്രൂപ്പ് നിയമ ഭേദഗതിയെ കുറിച്ച് നടന്ന ചർച്ചക്കിടെ അമിത് ഷാ അറിയിച്ചു. രാഹുൽ ഗാന്ധിയെ പ്രതീക്ഷിച്ചിരുന്ന സമയത്ത് കോൺഗ്രസ് പ്രവർത്തകർ അതെ കാറിൽ എത്തിയത് സംശയകരമാണെന്നും അദ്ദേഹം പറഞ്ഞു.
നവംബർ 25 ന് രാഹുൽ ഗാന്ധി പ്രിയങ്ക ഗാന്ധിയുടെ വീട് സന്ദർശിക്കേണ്ടതായിരുന്നു. എന്നാൽ രാഹുൽ ഗാന്ധി എത്തേണ്ട സമയത്ത് വീടിനുള്ളിലേക്ക് കയറിയ ഒരു കറുത്ത ടാറ്റാ സഫാരി വാഹനത്തിൽ രാഹുൽ ഗാന്ധിക്ക് പകരം കോൺഗ്രസ് പ്രവർത്തകയായ ശാരദ ത്യാഗിയും മറ്റ് മൂന്ന് പേരുമാണ് ഉണ്ടായിരുന്നത്.
സുരക്ഷാ പരിശോധനയില്ലാതെയാണ് കാർ അകത്തു കയറിയത്. വിചിത്രമായ യാദൃശ്ചികത ഉണ്ടായിരുന്നിട്ടും അന്വേഷണത്തിന് ഉത്തരവിട്ടതായും മൂന്ന് പേരെ സസ്പെൻഡ് ചെയ്തതായും ആഭ്യന്തരമന്ത്രി പറഞ്ഞു. ഒരു കുടുംബത്തെ ലക്ഷ്യം വച്ചുള്ളതല്ല എസ്‌പി‌ജി നിയമമെന്നും ഷാ കൂട്ടിചേർത്തു.
കുടുംബത്തെ എതിർക്കുന്നില്ലെന്നും മറിച്ച് സ്വജനപക്ഷപാതത്തെ ശക്തമായി എതിർക്കുമെന്നും അമിത് ഷാ പറഞ്ഞു. എന്തുകൊണ്ടാണ് ഗാന്ധി കുടുംബത്തിന്‍റെ സുരക്ഷയെക്കുറിച്ച് മാത്രം സംസാരിക്കപ്പെടുന്നതെന്ന് അമിത് ഷാ ചോദിച്ചു.ഗാന്ധി കുടുംബം ഉൾപ്പടെ 130 കോടി ഇന്ത്യക്കാരുടെ സുരക്ഷാ ഉത്തരവാദിത്തം സർക്കാരിനാണെന്നും അമിത് ഷാ പറഞ്ഞു.
