ഭോപ്പാല്: പൗരത്വ നിയമഭേദഗതിയെ അനുകൂലിച്ചുകൊണ്ടുള്ള സന്ദേശവുമായി പട്ടം പറത്തി ബിജെപി എംപി പ്രഗ്യാ സിംഗ് താക്കൂര്. മകര സംക്രാന്തി ദിവസത്തില് റിവേര നഗരത്തിലാണ് പ്രഗ്യാ സിംഗ് താക്കൂര് പട്ടം പറത്തി പിന്തുണ അറിയിച്ചത്. പൗരത്വ നിയമഭേദഗതിയെ എതിര്ക്കുന്നവര്ക്കുള്ള അടിയാണിതെന്ന് ഭോപ്പാലില് നിന്നുള്ള എംപിയായ പ്രഗ്യാ സിംഗ് താക്കൂര് പറഞ്ഞു.
പട്ടത്തില് സിഎഎ, ആര്ട്ടിക്കിള് 370, രാമക്ഷേത്രം എന്നിവയെക്കുറിച്ച് എഴുതിയിരുന്നു. രാജ്യം ഉയരത്തിലേക്ക് പറക്കുന്നതിന്റെ പ്രതീകമാണ് ഈ പട്ടം പറത്തലെന്നും ജനങ്ങള്ക്ക് മകര സംക്രാന്തി ആശംസകള് അറിയിക്കുന്നുവെന്നും പ്രഗ്യാ സിംഗ് താക്കൂര് മാധ്യമങ്ങളോട് പറഞ്ഞു. രാജ്യത്തിന്റെ താല്പര്യത്തിനായുള്ള നിയമം നിലനില്ക്കുകയും വിജയിക്കുകയും ചെയ്യുമെന്നും മധ്യപ്രദേശില് നിയമം നടപ്പാക്കില്ലെന്ന മുഖ്യമന്ത്രി കമല്നാഥിന്റെ പ്രസ്താവനയ്ക്കുള്ള മറുപടിയായി പ്രഗ്യാ സിംഗ് താക്കൂര് പറഞ്ഞു.