ഭുവനേശ്വർ: ഒഡിഷയിലെ കൊവിഡ് സാഹചര്യങ്ങൾ വീഡിയോ കോൺഫറൻസിലൂടെ അവലോകനം ചെയ്ത് മുഖ്യമന്ത്രി നവീൻ പട്നായിക്. കൊവിഡിനെതിരായ പോരാട്ടത്തിൽ പ്രവർത്തിച്ചുകൊണ്ടിരിക്കുന്ന ആളുകളുടെ പ്രതിബദ്ധതയെ മുഖ്യമന്ത്രി പ്രശംസിച്ചു.
കൊവിഡിനെതിരെയുള്ള പോരാട്ടത്തിനിടെ മരിച്ച ആരോഗ്യ പ്രവർത്തകരുടെ കുടുംബങ്ങൾക്ക് 50 ലക്ഷം രൂപ കേന്ദ്ര സർക്കാർ പ്രഖ്യാപിച്ചതായി ഔദ്യോഗിക അറിയിപ്പിൽ പറയുന്നു. ഇതിന്‍റെ ഭാഗമായി കൊവിഡ് ഡ്യൂട്ടിക്കിടെ കൊല്ലപ്പെട്ട 60 പേരുടെ പട്ടിക സംസ്ഥാന സർക്കാർ അയച്ചെങ്കിലും ഒരാൾക്ക് മാത്രമെ സഹായം നൽകാനാകുവെന്ന് കേന്ദ്ര സർക്കാർ അറിയിച്ചതായി നവീൻ പട്നായക് പറഞ്ഞു. ഇക്കാര്യത്തിൽ സംസ്ഥാന സർക്കാർ വീണ്ടും കേന്ദ്രസർക്കാരുമായി സംസാരിക്കുമെന്ന് മുഖ്യമന്ത്രി പറഞ്ഞു.
വീടുകളിൽ ഐസൊലെഷനിൽ കഴിയുന്ന രോഗികളുമായും കൊവിഡ് ആശുപത്രിയിലെ രോഗികളുമായും ബന്ധപ്പെട്ടണമെന്നും അവരുടെ ക്ഷേമം അന്വേഷിക്കണമെന്നും മുതിർന്ന ഉദ്യോഗസ്ഥരോട് മുഖ്യമന്ത്രി ആവശ്യപ്പെട്ടിട്ടുണ്ട്.
സംസ്ഥാനത്ത് രണ്ട് ലക്ഷം ആളുകൾ കൊവിഡ് മുക്തരായതിൽ നവീൻ പട്നായിക് സംതൃപ്തി പ്രകടിപ്പിച്ചു. ദേശീയ രോഗമുക്തി നിരക്ക് 85 ശതമാനവും സംസ്ഥാനത്തിന്‍റെ രോഗമുക്തി നിരക്ക് 89 ശതമാനവുമാണെന്ന് അദ്ദേഹം പറഞ്ഞു.
കഴിഞ്ഞ എട്ട് മാസത്തിനിടെ സംസ്ഥാനത്ത് 36 ലക്ഷം കൊവിഡ് ടെസ്റ്റുകളാണ് നടത്തിയത്. ഉത്സവകാലം വരുന്നതിനാൽ എല്ലാവരും കൂടുതൽ ജാഗ്രത പാലിക്കണമെന്ന് മുഖ്യമന്ത്രി നവീൻ പട്നായിക് ജനങ്ങളോട് അഭ്യർത്ഥിച്ചു.
കട്ടക്ക്, പുരി, ഭുവനേശ്വർ എന്നിവിടങ്ങളിൽ ഒരു ലക്ഷം ആന്‍റി വൈറൽ മരുന്നുകൾ നൽകിയിട്ടുണ്ടെന്ന് കൊവിഡ് മാനേജ്‌മെന്‍റിന്‍റെ വിശദമായ വിവരണം നടത്തുന്നതിനിടെ ചീഫ് സെക്രട്ടറി അസിത് ത്രിപാഠി പറഞ്ഞു.
സംസ്ഥാനത്തെ മരണനിരക്ക് 0.4 ശതമാനമാണെന്നും ഇത് ഇന്ത്യയിലെ എല്ലാ പ്രധാന സംസ്ഥാനങ്ങളെക്കാൾ ഏറ്റവും താഴ്ന്ന നിരക്കാണെന്നും ആരോഗ്യവകുപ്പ് അഡീഷണൽ ചീഫ് സെക്രട്ടറി പി കെ മോഹൻപത്ര പറഞ്ഞു. കൊവിഡ് മുക്തിയുടെ കാര്യത്തിൽ ഒഡിഷ ആറാം സ്ഥാനത്താണ്.
