ദിസ്‌പൂര്‍: അസമില്‍ സഞ്ചാരികളുടെ എണ്ണത്തില്‍ ഗണ്യമായ കുറവ്. ഇന്ത്യയില്‍ നിന്നും മാത്രമല്ല ലോകത്തിന്‍റെ വിവിധ ഭാഗങ്ങളില്‍ നിന്നുമെത്തുന്ന സഞ്ചാരികളുടെ ഇഷ്‌ട വിനോദ കേന്ദ്രമായിരുന്നു അസം. മുന്‍ വര്‍ഷങ്ങളെ അപേക്ഷിച്ച് ഈ വര്‍ഷം സഞ്ചാരികളുടെ എണ്ണത്തില്‍ വന്‍ കുറവാണ് ഉണ്ടായത്. 4.5 മുതല്‍ 5കോടിയോളം രൂപയുടെ നഷ്‌ടമാണ് ഇക്കുറി വിനോദസഞ്ചാര മേഖലക്കുണ്ടായത്. സംസ്ഥാനത്തിലെ നിലവിലെ രാഷ്ട്രീയ സാഹചര്യമാണ് വിനോദസഞ്ചാര മേഖലയിലെ തളര്‍ച്ചക്ക് പ്രധാന കാരണം. കാസിരംഗ ദേശീയഉദ്യാനത്തില്‍ 2018ല്‍ 33259 സഞ്ചാരികളെത്തിയിരുന്നു.എന്നാല്‍ 2019ല്‍ സഞ്ചാരികളുടെ എണ്ണം 15218ആയി കുറഞ്ഞു. വന്യജീവി സങ്കേതമായ കക്കോയിജനയില്‍ 2019ല്‍ ഒരു സഞ്ചാരിപോലും സന്ദര്‍ശനത്തിനെത്തിയില്ല. ഗോള്‍ണ്ടന്‍ ലങ്കൂറുകള്‍ക്ക് പ്രസിദ്ധമായ വന്യജീവി സങ്കേതമാണിത്.
പ്രകൃതി സൗന്ദര്യം കൊണ്ട് അനുഗ്രഹിക്കപ്പെട്ടതും വൈവിധ്യങ്ങളുടെ കലവറയുമായ അസം സഞ്ചാരികളെ ഏറെ ആകര്‍ഷിച്ചിരുന്നു. കാസിരംഗ ദേശീയഉദ്യാനം, കാമകായ ക്ഷേത്രം,ഉമാനന്ദ ക്ഷേത്രം എന്നിവടങ്ങളില്‍ ആയിരങ്ങളാണ് ഓരോ വര്‍ഷവും സന്ദര്‍ശനത്തിനെത്തിയിരുന്നത്.
