ന്യൂ ഡൽഹി: ഡൽഹിയിൽ സെപ്റ്റിക്ക് ടാങ്ക് വൃത്തിയാക്കുന്നതിനിടെ രണ്ടു പേർ മരിച്ച സംഭവത്തിൽ ദേശീയ മനുഷ്യാവകാശ കമ്മീഷൻ ഡൽഹി ചീഫ് സെക്രട്ടറിക്കും പൊലീസ് കമ്മീഷണർക്കും നോട്ടീസ് അയച്ചു.
മാധ്യമവാർത്തകളുടെ അടിസ്ഥാനത്തിലാണ് മനുഷ്യാവകാശ കമ്മീഷൻ നോട്ടീസ് അയച്ചത്. കഴിഞ്ഞ ദിവസം ഡൽഹിയിലെ പ്രേം നഗറിൽ നിർമ്മാണ പ്രവർത്തനത്തിലുണ്ടായിരുന്ന വീടിന്‍റെ സെപ്റ്റിക്ക് ടാങ്ക് വൃത്തിയാക്കാൻ ഇറങ്ങിയ അഞ്ച് പേരിൽ രണ്ടു പേരാണ് മരിച്ചത്. മറ്റു മൂന്നു പേർ ആശുപത്രിയിൽ ചികിത്സയിലാണ്.
സെപ്റ്റിക്ക് ടാങ്കിലേക്ക് ഇറങ്ങാൻ ആദ്യം ഇവർ നിരസിച്ചെങ്കിലും മൂന്നു ദിവസത്തെ വേതനം നൽകില്ലെന്ന് വീട്ടുടമ പറഞ്ഞതിനാൽ ഇവർ ഇറങ്ങുകയായിരുന്നു. സംഭവത്തിൽ മനുഷ്യാവകാശ കമ്മീഷൻ ആറാഴ്ച്ചക്കകം റിപ്പോർട്ട് നൽകാൻ ആവശ്യപ്പെട്ടു.
അനധികൃതമായി സെപ്റ്റിക്ക് ടാങ്ക് നിർമ്മിക്കുന്നതിലും വൃത്തിയാക്കുന്നതിലും ഡൽഹി സർക്കാർ കർശന നടപടികൾ എന്തുകൊണ്ട് സ്വീകരിക്കുന്നില്ല എന്ന് നോട്ടീസിൽ ചോദിക്കുന്നുണ്ട്.
അനധികൃതമായി സെപ്റ്റിക്ക് ടാങ്ക നിർമ്മിച്ചതും തൊഴിലാളികളെ നിർബന്ധിച്ച് അതിൽ ഇറക്കിയതും രണ്ട് വിലയേറിയ ജീവനുകൾ നഷ്ടപ്പെടാൻ കാരണമായി എന്ന് കമ്മീഷൻ ചൂണ്ടിക്കാട്ടി.
സംഭവത്തിൽ ഇന്ത്യൻ ശിക്ഷ നിയമം 304/34 പ്രകാരം കേസ് രജിസ്റ്റർ ചെയ്തിട്ടുണ്ട്. വീട്ടുടമയെ ഡൽഹി പൊലീസ് അറസ്റ്റ് ചെയ്തു.
