ഹൈദരാബാദ്: ദുർമന്ത്രവാദത്തിലേർപ്പെട്ടുവെന്ന് ആരോപിച്ച് ഷാമിർപേട്ടിൽ ഒരാളെ വെട്ടിക്കൊന്നു. ആറ് വർഷമായി രോഗബാധിതയായിരുന്ന ജി ലക്ഷ്‌മി (45) എന്ന സ്‌ത്രീ മരിച്ചതിനെത്തുടർന്നാണ് അദ്രസുപള്ളി ഗ്രാമവാസികൾ ഇരുപത്തിനാലുകാരനെ കൊലപ്പെടുത്തിയത്. ലക്ഷ്‌മി മരിക്കാൻ കാരണം ദുർമന്ത്രവാദം പ്രയോഗിച്ചതിനാലാണെന്ന് ഗ്രാമവാസികൾ ആരോപിച്ചിരുന്നു.
മരിച്ച സ്ത്രീയുടെ ശവസംസ്‌കാര ചടങ്ങിൽ ദുർമന്ത്രവാദം ചെയ്തെന്ന് സംശയിച്ച യുവാവിനെ കണ്ടതോടെ ആളുകൾ കൂട്ടം ചേർന്ന് മർദിക്കുകയും അരിവാൾ ഉപയോഗിച്ച് ആക്രമിക്കുകയും ചെയ്‌തു. സംഭവസ്ഥലത്ത് വച്ച് തന്നെ മരണപ്പെട്ട യുവാവിന്‍റെ മൃതദേഹം കത്തിച്ച ശേഷം ഗ്രാമവാസികൾ ഓടി രക്ഷപ്പെട്ടു. ബാലനഗർ ഡിസിപി പത്മജ സ്ഥലം പരിശോധിച്ച് കേസ് രജിസ്റ്റർ ചെയ്‌തു.
