റാഞ്ചി: ചൈനയിൽ നിന്ന് ജാർഖണ്ഡിലെ റാഞ്ചിയിലേക്കും ജംഷദ്‌പൂരിലേക്കെത്തിയ നാല് പേർക്ക് കൊറോണ വൈറസ് പരിശോധനയിൽ രോഗമില്ലെന്ന് സ്ഥിരീകരിച്ചു. നാലുപേരുടെയും രക്ത സാമ്പിളുകൾ ജാർഖണ്ഡിലെ രണ്ട് സർക്കാർ മെഡിക്കൽ കോളജുകളിലേക്കും പൂനെയിലെ നാഷണൽ ഇൻസ്‌റ്റിറ്റ്യൂട്ട് ഓഫ് വൈറോളജിയിലേക്കും പരിശോധനക്കായി അയച്ചിരുന്നു.
എല്ലാ സ്ഥാപനങ്ങളിൽ നിന്നുമുള്ള റിപ്പോർട്ടുകൾ രോഗം ബാധിച്ചിട്ടില്ലെന്ന് സ്ഥിരീകരിച്ചതായി ആരോഗ്യവകുപ്പ് പ്രസ്‌താവനയിലൂടെ അറിയിച്ചു. കൊറോണ വൈറസ് പടർന്ന ചൈനയിൽ നിന്നും മറ്റ് രാജ്യങ്ങളിൽ നിന്നും 19 പേർ അടുത്തിടെ സംസ്ഥാനത്തേക്ക് മടങ്ങിയെത്തി. ഇവർ 28 ദിവസം വീട്ടിൽ നിരീക്ഷണത്തിൽ കഴിയണമെന്ന് നിർദ്ദേശം നൽകിയിട്ടുണ്ട്.
