ന്യൂഡല്‍ഹി: നിയമസഭാ തെരഞ്ഞെടുപ്പിനായി രാജ്യ തലസ്ഥാനം ഒരുങ്ങുമ്പോൾ എല്ലാ പാർട്ടികളും തിരക്കിട്ട പ്രചാരണ പരിപാടികളിലാണ്. ഡല്‍ഹിയിലെ വിവിധയിടങ്ങളില്‍ പ്രചാരണവുമായി സജീവമാണ് ബിജെപി നേതാക്കൾ. ജമ്മു കശ്മീരിലെ ബിജെപി അധ്യക്ഷൻ രവീന്ദ്ര റെയ്നയും ഡല്‍ഹിയില്‍ പ്രചാരണത്തിനുണ്ട്. ഡല്‍ഹിയില്‍ ബിജെപി അധികാരത്തിലെത്തുമെന്ന് രവീന്ദ്ര റെയ്ന ഇടിവി ഭാരതിനോട് പറഞ്ഞു. ഷഹീൻ ബാഗില്‍ ഉയർന്ന് വരുന്നത് പാകിസ്ഥാനെ പിന്തുണയ്ക്കുന്ന മുദ്രാവാക്യങ്ങളാണ്. ഫെബ്രുവരി എട്ടിന് ഡല്‍ഹിയിലെ ജനങ്ങൾ സർജിക്കല്‍ സ്ട്രൈക്കിലൂടെ ബിജെപിയെ അധികാരത്തിലെത്തിക്കും. ബിജെപി അധികാരത്തിലെത്തിയാല്‍ ഒരു മണിക്കൂറിനുള്ള ഷഹീൻ ബാഗ് പ്രതിഷേധം അവസാനിപ്പിക്കുമെന്നും റെയ്ന കൂട്ടിച്ചേർത്തു.
പ്രതിഷേധത്തിന് ഡല്‍ഹി മുഖ്യമന്ത്രി അരവിന്ദ് കെജ്‌രിവാളും കോൺഗ്രസ് നേതാവ് രാഹുല്‍ ഗാന്ധിയുമാണ് ധനസഹായം നല്‍കുന്നതെന്നും അദ്ദേഹം ആരോപിച്ചു. ഡല്‍ഹിയിലെ സാധാരണക്കാരായ ജനങ്ങൾ വളരെയധികം പ്രശ്നങ്ങൾ നേരിടുന്നുണ്ട്. അതിന് കാരണം അരവിന്ദ് കെജ്‌രിവാൾ തന്നെയാണ്. മുഖ്യമന്ത്രിയായ അരവിന്ദ് കെജ്‌രിവാൾ എന്തുകൊണ്ടാണ് പ്രതിഷേധക്കാർക്ക് എതിരെ നടപടി സ്വീകരിക്കാത്തതെന്നും രവീന്ദ്ര റെയ്ന ചോദിച്ചു.
