ഹൈദരാബാദ്: ഹൈദരാബാദിലെ വെള്ളപ്പൊക്ക ദുരിതബാധിത പ്രദേശങ്ങൾ തെലങ്കാന മുനിസിപ്പൽ അഡ്മിനിസ്ട്രേഷനും നഗരവികസന മന്ത്രിയുമായ കൽവകുന്ത്ല താരക രാമ റാവു (കെടിആർ) സന്ദർശിച്ചു. കെടിആർ ഗ്രേറ്റർ ഹൈദരാബാദ് മുനിസിപ്പൽ കോർപ്പറേഷൻ (ജിഎച്ച്സിഎം) ഓഫീസിലെത്തി, ഊർജ്ജ കമ്പനികളുമായും മറ്റ് വകുപ്പുകളുമായും ഏകോപിപ്പിച്ച് ദുരിതാശ്വാസ പ്രവർത്തനങ്ങൾ ശക്തമാക്കണമെന്ന് ഉദ്യോഗസ്ഥർക്ക് നിർദേശം നൽകി.
കെടിആർ നടത്തിയ ടെലി കോൺഫറൻസിൽ സംസ്ഥാന ചീഫ് സെക്രട്ടറി സോമേഷ് കുമാർ, മുനിസിപ്പൽ വകുപ്പ് മേധാവികൾ, റവന്യൂ, ആരോഗ്യം, മറ്റ് വകുപ്പുകൾ എന്നിവരും പങ്കെടുത്തു. യോഗത്തിനുശേഷം, നഗരത്തിലെ വെള്ളപ്പൊക്ക സാഹചര്യം അറിയാൻ കെടിആർ വിവിധ വകുപ്പുകളിലെ ഉദ്യോഗസ്ഥരുമായി അവലോകന യോഗം നടത്തി.
അടിയന്തര ആശ്വാസം ആവശ്യമുള്ള എല്ലാവർക്കും ഭക്ഷണം, പുതപ്പ്, മെഡിക്കൽ സൗകര്യങ്ങൾ എന്നിവ നൽകാൻ സംസ്ഥാന സർക്കാർ ശ്രമിക്കുകയാണെന്നും മന്ത്രി പറഞ്ഞു. കനത്ത മഴ തുടരാൻ സാധ്യതയുള്ളതിനാൽ ജിഎച്ച്എംസി സ്ഥാപിച്ച കേന്ദ്രങ്ങളിൽ താമസിക്കാൻ ജനങ്ങളോട് ആവശ്യപ്പെട്ടു.
