ഗൂഗിള്‍ സിഇഒ സുന്ദര്‍ പിച്ചൈയുടെ ക്രിക്കറ്റ് ആരാധന എല്ലാവര്‍ക്കും സുപരിചിതമാണ്. പഠനകാലത്ത് ഒരു ക്രിക്കറ്റ് കളിക്കാരന്‍ ആകണമെന്നായിരുന്നു മോഹം. അക്കാലത്ത് സുനില്‍ ഗവാസ്‌കറും ടെന്‍ഡുല്‍ക്കറുമായിരുന്നു ആരാധനാപാത്രങ്ങളെന്ന് സുന്ദര്‍ പിച്ചൈ പറഞ്ഞിരുന്നു.
ഇപ്പോള്‍ സുന്ദര്‍ പിച്ചൈ ക്രിക്കറ്റ് താരം സച്ചിന്‍ ടെന്‍ഡുല്‍ക്കറിനൊപ്പം നില്‍ക്കുന്ന ചിത്രം സമൂഹമാധ്യമങ്ങളില്‍ ആരാധകര്‍ ഏറ്റെടുത്തിരിക്കുകയാണ്. കഴിഞ്ഞ ദിവസം ബിസിസിഐയാണ് 'ഗൂഗുള്‍ സിഇഒ സുന്ദര്‍ പിച്ചൈ മാസ്റ്റര്‍ ബ്ലാസ്റ്റര്‍ സച്ചിന്‍ ടെന്‍ഡുല്‍ക്കറിനൊപ്പം' എന്ന ക്യാപഷനോടെ ഒഫിഷ്യല്‍ ട്വിറ്ററില്‍ ചിത്രം പോസ്റ്റ് ചെയ്തത്. എഡ്‌ജ്ബാസ്റ്റണില്‍ ഇന്ത്യ-ഇംഗ്ലണ്ട് ലോകകപ്പ് മത്സരം കാണാനെത്തിയതായിരുന്നു പിച്ചൈ. മുപ്പത്തിയേഴായിരം പേരാണ് പോസ്റ്റ് ഷെയര്‍ ചെയ്തിരിക്കുന്നത്. ലോകകപ്പ് ഫൈനല്‍ ഇന്ത്യയും ഇംഗ്ലണ്ടും തമ്മിലാകുമെന്ന് ഇന്ത്യ-യുഎസ് ബിസിനസ് കൗണ്‍സില്‍ സംഘടിപ്പിച്ച ഒരു പരിപാടിയില്‍ പിച്ചൈ പറഞ്ഞിരുന്നു.
