പൂര്‍ണിയ: ബിഹാര്‍ തെരഞ്ഞെടുപ്പിന് മുന്നോടിയായി കോണ്‍ഗ്രസ് അടങ്ങുന്ന പ്രതിപക്ഷ മഹാസഖ്യത്തിന് വന്‍ തിരിച്ചടി. പുറത്താക്കപ്പെട്ട പാര്‍ട്ടി നേതാവ് ശക്തി മാലിക്കിനെ കൊലപ്പെടുത്തിയ കേസില്‍ ആര്‍ജെഡി നേതാക്കളായ തേജസ്വി യാദവ്, തേജ് പ്രതാപ് യാദവ് എന്നിവര്‍ക്കെതിരെ ഞായറാഴ്ച എഫ്ഐആര് രജിസ്റ്റര്‍ ചെയ്തു. പ്രതിപക്ഷ മഹാസഖ്യത്തിന്‍റെ മുഖ്യമന്ത്രി സ്ഥാനാര്‍ത്ഥിയാണ് തേജസ്വി യാദവ്. കൊലപാതകവുമായി ബന്ധപ്പെട്ട് ആര്‍ജെഡി നേതാവ് തേജസ്വി യാദവ്, സഹോദരന്‍ തേജ് പ്രതാപ് യാദവ് എന്നിവരുള്‍പ്പെടെ ആറ് പേര്‍ക്കെതിരെ എഫ്ഐആര് രജിസ്റ്റര്‍ ചെയ്തതായി പൂര്‍ണിയ പോലീസ് സൂപ്രണ്ട് വിശാല്‍ ശര്‍മ പറഞ്ഞു. രാജ്യത്ത് നിര്‍മ്മിച്ച പിസ്റ്റളും ശൂന്യമായ വെടിയുണ്ടയും സംഭവസ്ഥലത്ത് നിന്ന് കണ്ടെത്തിയതായി കെ ഹാത്ത് പോലീസ് സ്റ്റേഷന്‍, സ്റ്റേഷന്‍ ഹൗസ് ഓഫീസര്‍ സുനില്‍ കുമാര്‍ മണ്ഡല്‍ പറഞ്ഞു.
ഞായറാഴ്ച മൂന്ന് പേര്‍ ബൈക്കില്‍ എത്തി പൂര്‍ണിയയിലെ ശക്തി മാലിക്കിന്‍റെ വീട്ടില്‍ പ്രവേശിച്ച് തലയ്ക്ക് വെടിവച്ചു കൊലപ്പെടുത്തുകയായിരുന്നു. ആര്‍ജെഡിയില്‍ നിന്ന് പുറത്താക്കപ്പെട്ടതിനെത്തുടര്‍ന്ന് ഭര്‍ത്താവ് സ്വതന്ത്ര സ്ഥാനാര്‍ത്ഥിയായി നിയമസഭാ തെരഞ്ഞെടുപ്പില്‍ മത്സരിക്കാന്‍ തയ്യാറെടുക്കുകയായിരുന്നുവെന്നും അതിന്‍റെ വൈരാഗ്യത്തില്‍ കൊലപ്പെടുത്തിയതാണെന്നും ഇത് ഒരു രാഷ്ട്രീയ കൊലപാതകമാണെന്നും മാലിക്കിന്‍റെ ഭാര്യ ആരോപിച്ചു. അതേസമയം, തേജസ്വിക്ക് എതിരെ തെളിവായി മാലിക്കിനെ ഭീഷണിപ്പെടുത്തുന്ന വീഡിയോ പുറത്തുവന്നിട്ടുണ്ട്.
മാലികിനോട് ആര്‍ജെഡി നേതാവായ തേജസ്വി രനിഗന്‍ജ് നിയോജകമണ്ഡലത്തില്‍ മത്സരിക്കാന്‍ പാര്‍ട്ടി ടിക്കറ്റ് നല്‍കാന്‍ സംഭാവനയായി 50 ലക്ഷം രൂപ നല്‍കണമെന്ന് പറയുന്നതായും ആര്‍.ജെ.ഡി എസ്സി / എസ്ടി സെല്‍ സംസ്ഥാന പ്രസിഡന്‍റ് ഉള്‍പ്പെടെ പട്‌ന തേജശ്വി പ്രസാദ് യാദവ് കൂടിക്കാഴ്ച നടത്തിയതായും വീഡിയോയില്‍ വ്യക്തമാക്കുന്നുണ്ട്. തന്‍റെ തീരുമാനം പിന്നീട് അറിയിക്കാമെന്ന് മാലിക് പറഞ്ഞപ്പോള്‍ തേജസ്വി അദ്ദേഹത്തിനെതിരെ ജാതി പരാമര്‍ശം നടത്തിയെന്നും അദ്ദേഹത്തെ ഇല്ലാതാക്കുമെന്ന് ഭീഷണിപ്പെടുത്തിയതായും വീഡിയോയില്‍ പറയുന്നു.
