ഹൈദരാബാദ്: ഗണേഷ് വിഗ്രഹ നിമഞ്ജന ചടങ്ങിൽ യുവാക്കൾ വഴക്കുണ്ടാക്കിയതിനെ തുടർന്ന് വായുവിൽ വെടിയുതിർത്ത വിരമിച്ച സൈനികൻ അറസ്റ്റിൽ.ആഘോഷങ്ങളെ തുടർന്ന് യുവാക്കൾ ശബ്ദമുണ്ടാക്കുകയും ഉച്ചത്തിൽ സംഗീതം ആലപിക്കുകയും ചെയ്തുവെന്നാരോപിച്ചാണ് ലൈസൻസുള്ള പിസ്റ്റൾ ഉപയോഗിച്ച് ഇയാൾ രണ്ട് റൗണ്ട് വെടിവച്ചത്. ആർക്കും പരിക്കില്ലെന്ന് പൊലീസ് പറഞ്ഞു. പ്രാദേശിക ടിവി ചാനലുകൾ സംപ്രേഷണം ചെയ്ത വീഡിയോ ഫൂട്ടേജിൽ മുൻ സൈനികൻ തന്‍റെ പിസ്റ്റൾ പുറത്തെടുത്ത് വായുവിൽ വെടിയുതിർക്കുന്നതായി കാണാം.
യുവാക്കളുടെ പെരുമാറ്റത്തെ വിമർശിച്ച ഹവിൽദാർ എതിർത്തതായും മറ്റുള്ളവരെ ശല്യപ്പെടുത്തരുതെന്ന് അവരോട് പറഞ്ഞതായും നർസിംഗി പൊലീസ് ഇൻസ്പെക്ടർ ഗംഗാധർ പറഞ്ഞു. സംഘത്തിലെ ചിലർ മുൻ സൈനികനുമായി വഴക്കിടാൻ ശ്രമിച്ചതിനെ തുടർന്നാണ് വെടിയുതിർക്കുകയും ഭീഷണിപ്പെടുത്തുകയും ചെയ്തത്. പരാതിയെത്തുടർന്ന് ആയുധ നിയമത്തിലെ പ്രസക്തമായ വകുപ്പുകൾ പ്രകാരം പൊലീസ് കേസ് രജിസ്റ്റർ ചെയ്യുകയും വിരമിച്ച സൈനികനെ അറസ്റ്റ് ചെയ്യുകയും ചെയ്തു.
