ന്യൂഡല്ഹി : സീ മീഡിയയെ അപകീര്ത്തിപ്പെടുത്തിയെന്ന പരാതിയില് തൃണമൂല് കോൺഗ്രസ് എംപി മഹുവ മൊയ്ത്രയെ ഡല്ഹി കോടതി വെള്ളിയാഴ്ച വിചാരണ നടത്തി. ചീഫ് അഡീഷണല് മെട്രോപൊളിറ്റന് മജിസ്ട്രേറ്റ് വിശാല് പഹൂജ ഇന്ത്യന് ശിക്ഷ നിയമപ്രകാരം സെക്ഷന് 499, 500 എന്നീ വകുപ്പുകൾ ചുമത്തിയാണ് മൊയ്ത്രക്കെതിരെ കേസെടുത്തത്. മൊയ്ത്രക്കെതിരെ വിചാരണ നടത്തുന്നതിനാവശ്യമായ തെളിവുകൾ ഉണ്ടെന്ന സീ മീഡിയയുടെ അഭിഭാഷകന് വിജയ് അഗര്വാളിന്റെ വാദം കോടതി അംഗീകരിച്ചു.
അപകീര്ത്തിപ്പെടുത്തല് കുറ്റത്തിന് രണ്ട് വര്ഷം വരെ തടവാണ് ശിക്ഷ. ഇരുപതിനായിരം രൂപ കെട്ടിവെച്ചതിനെ തുടര്ന്ന് ഡിസംബര് 17 ന് കോടതി മൊയ്ത്രക്ക് ജാമ്യം അനുവദിച്ചിരുന്നു. ഇരു കക്ഷികളോടും ഒത്തുതീര്പ്പിന്റെ സാധ്യതയെപ്പറ്റിയും കോടതി ചോദിച്ചിരുന്നു. സീ ന്യൂസിനെതിരെ പ്രസ്താവനകൾ നടത്തിയതിനെ തുടര്ന്നാണ് സീ ന്യുസ് മഹ്വുവ മൊയ്ത്രക്കെതിരെ പരാതി നല്കിയത്.