ന്യൂഡൽഹി: രാജ്യതലസ്ഥാനത്ത് നടന്ന സെറോ സർവേയിൽ 29.1 ശതമാനം ആളുകളിൽ കൊവിഡ് -19നെതിരായ ആന്‍റിബോഡികൾ കണ്ടെത്തിയതായി ഡൽഹി ആരോഗ്യമന്ത്രി സത്യേന്ദർ ജെയിൻ അറിയിച്ചു. ഓഗസ്റ്റ് 1-7 തിയതികളിൽ നടത്തിയ സർവേയിൽ 11 ജില്ലകളിൽ നിന്ന് 15,000 പ്രതിനിധി സാമ്പിളുകൾ എടുത്തിട്ടുണ്ടെന്നും അടുത്ത സർവേ സെപ്റ്റംബർ 1 മുതൽ ആരംഭിക്കുമെന്നും അദ്ദേഹം പറഞ്ഞു.
പുരുഷന്മാരിൽ ആന്‍റിബോഡി കാണപ്പെടുന്നത് 28.3 ശതമാനം എന്ന നിരക്കിലും സ്ത്രീകളില്‍ 32.2 ശതമാനമാണെന്നും മന്ത്രി പറഞ്ഞു. 18 വയസ്സിന് താഴെയുള്ളവരിൽ കണ്ടെത്തിയ ആന്‍റിബോഡികളുടെ സെറോ വ്യാപനം 34.7 ശതമാനവും 18-50 വയസിനിടയിൽ 28.5 ശതമാനവും 50 വയസ്സിനു മുകളിലുള്ളവരിൽ 31.2 ശതമാനവുമാണ്.
ഡൽഹിയിലെ ജനസംഖ്യ രണ്ട് കോടി ആയി കണക്കാക്കിയാൽ 58 ലക്ഷത്തോളം പേരിൽ ആന്‍റിബോഡികൾ വികസിച്ചിട്ടുണ്ട്. ന്യൂഡൽഹിയിലെ മൗലാന ആസാദ് മെഡിക്കൽ കോളേജിന്‍റെ (എം‌എം‌സി) സാങ്കേതിക സഹായത്തോടെയാണ് എൻ‌സി‌ടി ഡൽഹി സർക്കാർ സർവേ ആസൂത്രണം ചെയ്തത്.
