പുൽവാമ ഭീകരാക്രമണത്തിന്‍റെ പശ്ചാത്തലത്തിൽ നാളെ രാവിലെ 11 മണിക്ക് പാർലമെന്‍റ് ലൈബ്രറിയില്‍ സർവകക്ഷിയോഗം ചേരും. കേന്ദ്ര ആഭ്യന്തരമന്ത്രി രാജ് നാഥ് സിംഗിന്‍റെ അധ്യക്ഷതയിലാണ് സര്‍വ്വകക്ഷി യോഗം. പുൽവാമ ഭീകരാക്രമണത്തെത്തുടർന്ന് ഇനി സ്വീകരിക്കേണ്ട നടപടികളെക്കുറിച്ച് പ്രതിപക്ഷ കക്ഷികൾക്കിടയിൽ സമവായമുണ്ടാക്കാനാണ് യോഗം. ഇത് രണ്ടാം തവണയാണ് മോദി സർക്കാരിന്‍റെ കാലത്ത് സർവകക്ഷിയോഗം വിളിക്കുന്നത്.
ആദ്യ തവണ സർവകക്ഷിയോഗം വിളിച്ചത് സർജിക്കൽ സ്ട്രൈക്ക് നടത്തിയ ശേഷമായിരുന്നു. സര്‍ജിക്കല്‍ സ്ട്രൈക്കിനെ സംബന്ധിച്ച വിശദീകരണത്തിനായാണ് യോഗം വിളിച്ചത്. 2016 സെപ്തംബറില്‍ നടന്ന അന്നത്തെ സര്‍വ്വകക്ഷിയോഗം ചര്‍ച്ചകള്‍ ലക്ഷ്യമിട്ടല്ല, മിന്നലാക്രമണം നടപ്പാക്കിയത് എങ്ങനെയെന്ന് വിശദീകരിക്കാന്‍ മാത്രമായിരുന്നു.
അതേസമയം, ഭീകരരെ നേരിടുന്നതിൽ സർക്കാരിനും സൈന്യത്തിനും ഒപ്പമാണെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി പറഞ്ഞു. ഇത് ദു:ഖത്തിന്‍റെയും സൈനികരെ ബഹുമാനിക്കാനുമുള്ള സമയമാണ്. അതിനപ്പുറം ഒരു സംസാരത്തിനും ഈ സമയം പ്രസക്തിയില്ല. ഇത് രാഷ്ട്രീയം പറയേണ്ട സമയമല്ലെന്നും ഇന്ന് കോണ്‍ഗ്രസ് ആസ്ഥാനത്ത് നടത്തിയ വാര്‍ത്താ സമ്മേളനത്തില്‍ രാഹുല്‍ ഗാന്ധി പറഞ്ഞു.
