ലഖ്‌നൗ: നദീതീരമണൽ കടത്തുന്നത് തടഞ്ഞ പൊലീസ് ഉദ്യോഗസ്ഥനെ ട്രാക്‌ടർ ഇടിച്ച് കൊലപ്പെടുത്തി. പൊലീസ് കോൺസ്റ്റബിൾ സോനു കുമാർ ചൗധരിയാണ് കൊല്ലപ്പെട്ടത്. മോർട്ടോർ സൈക്കിളിൽ മണൽ കടത്തുന്ന ലോറിയെ പിന്തുടരുന്നതിനിടെയാണ് സംഭവം. അനനധികൃത മണൽ ഖനനം തടയുന്നതിനായി പൊലീസ് വിവിധ സംഘങ്ങളെ രൂപീകരിച്ചിരുന്നു.
പുലർച്ചെ മൂന്ന് മണിയോടെ ഖനനം ലഭിക്കുന്നുവെന്ന് വിവരം ലഭിച്ചതിനെ തുടർന്നാണ് ഉദ്യോഗസ്ഥൻ സംഭവസ്ഥലത്തെത്തിയത്. ആറോളം ട്രാക്‌ടറുകൾ പോകുന്നതു കണ്ട സോനു വാഹനങ്ങളെ പിന്തുടരുകയായിരുന്നു. വാഹനം തടയാൻ ശ്രമിച്ച പൊലീസ് ഉദ്യോഗസ്ഥനെ ഇടിച്ചിട്ട് വാഹനങ്ങൾ പോകുകയായിരുന്നു. സംഭവ സ്ഥലത്ത് വെച്ച് തന്നെ പൊലീസ് ഉദ്യോഗസ്ഥൻ കൊല്ലപ്പെട്ടു. സംഭവത്തിൽ പൊലീസ് അന്വേഷണം ആരംഭിച്ചു. അപകടത്തിന് നിമിഷങ്ങൾക്ക് മുമ്പ് ചിത്രീകരിച്ച ഒരു വീഡിയോ സോഷ്യൽ മീഡിയയിൽ വൈറലായി.
