ബെംഗലുരു: കർണാടകയിൽ മൂന്ന് തീവ്രാവാദികൾ അറസ്റ്റിൽ. ബെംഗലുരു ക്രൈം ബ്രാഞ്ചിന്‍റെ സഹായത്തോടെ ഇന്‍റലിജന്‍റ്സ് ഉദ്യോഗസ്ഥരും തമിഴ്നാട് സിഐഡി ഉദ്യാഗസ്ഥരും ചേർന്നാണ് തീവ്രവാദ സംഘടനയായ അൽ-ഉമയിലെ അംഗങ്ങളായ മുഹമ്മദ് ഹനീഫ്(29), ഇമ്രാൻ ഖാൻ(32), ഉസ്മാൻ ഗനി(24) എന്നിവരെ അറസ്റ്റ് ചെയ്തത്.
കർണാടകയിലെ പ്രമുഖ ഹിന്ദു നേതാക്കളെ വധിക്കാൻ ഇവർ പദ്ധതിയിട്ടിരുന്നുവെന്നാണ് സൂചന. ബെംഗലുരുവിലെ ഹോസ്റ്റലിൽ ജോലി തേടിയെത്തിയവർ എന്ന വ്യാജേന ഇവർ പേയിംഗ് ഗസ്റ്റായി താമസിച്ച് വരികയായിരുന്നു. ഇവരിൽ രണ്ട് പേർക്ക് തമിഴ്നാട്ടിലെ ഹിന്ദു മുന്നണി നേതാവ് കെ.പി.എസ്. സുരേഷ് കുമാറിന്‍റെ കൊലപാതകക്കേസിൽ പങ്കുണ്ട്.
ബെംഗലുരുവിൽ തീവ്രവാദികൾ പിജികൾ കേന്ദ്രീകരിച്ച് താമസിക്കുകയാണെന്ന് പൊലീസ് പറഞ്ഞു. ഇവർക്ക് സംഘടനയുടെ തമിഴ്നാട്ടിൽ നിന്നുള്ള പ്രവർത്തകർ തോക്കുകളും വെടിയുണ്ടകളും കൈമാറിയെന്നും പൊലീസ് പറഞ്ഞു. സംഘടനയിൽ ആറുപേർ ഉണ്ടെന്നും ഇവർക്കായി അന്വേഷണം ആരംഭിച്ചെന്നും പൊലീസ് അറിയിച്ചു.
