ജമ്മു കശ്മീര്: ജമ്മു കശ്മീരിലെ ഷോപിയാനില്‍ ട്രക്കുകള്‍ക്ക് നേരെ ഭീകരര്‍ നടത്തിയ വെടിവയ്പ്പില്‍ രണ്ട് ട്രക്ക് ഡ്രൈവര്‍മാര്‍ കൊല്ലപ്പെട്ടു. ഒരാള്‍ക്ക് പരിക്കേറ്റു. ഷോപിയാനിലെ ചിത്രഗാമിലാണ് സംഭവം. ആപ്പിള്‍ കൊണ്ടുപോകാൻ പഞ്ചാബില്‍ നിന്നെത്തിയ ട്രക്കുകളുടെ ഡ്രൈവര്‍മാരാണ് ആക്രമണത്തിനിരയായത്. ട്രക്കുകള്‍ ഭീകരര്‍ അഗ്നിക്കിരയാക്കുകയും ചെയ്‌തു.
ഷോപിയാനില്‍ ആപ്പിള്‍ വ്യാപാരിയേയും രാജസ്ഥാനില്‍ നിന്ന് ട്രക്കിലെത്തിയ രണ്ടുപേരെയും ഭീകരര്‍ കഴിഞ്ഞ ദിവസങ്ങളില്‍ വധിച്ചിരുന്നു. കശ്മീര് താഴ്‌വരയില്‍ നിന്നുള്ള പഴങ്ങളുടെ വ്യാപാരം വര്‍ധിച്ചതിനെ തുടര്‍ന്നാണ് ഭീകരര്‍ ട്രക്ക് ഡ്രൈവര്‍മാര്‍ അടക്കമുള്ളവരെ ലക്ഷ്യം വെക്കുന്നതെന്ന് പൊലീസ് പറയുന്നു. കശ്മീരില് നിര്‍ത്തിവച്ച മൊബൈല്‍ ഫോണ്‍ സേവനങ്ങള്‍ അടുത്തിടെയാണ് പുനഃസ്ഥാപിച്ചത്. ഇതോടെ കശ്മീരില്‍നിന്നുള്ള പഴങ്ങളുടെ വ്യാപാരം ശക്തിപ്പെട്ടിരുന്നു.
