ന്യൂഡല്‍ഹി: ഭാരത് ബയോടെക്കിന്‍റെ ഇൻട്രാനാസൽ കൊവിഡ് വാക്സിന് (കുത്തിവയ്ക്കൽ ഒഴിവാക്കി മൂക്കിലൂടെ നല്‍കുന്നത് - നേസല്‍ വാക്സിൻ) ഡ്രഗ്‌സ് കൺട്രോളർ ജനറൽ ഓഫ് ഇന്ത്യയുടെ അടിയന്തര ഉപയോഗ അനുമതി ലഭിച്ചതായി അധികൃതര്‍ അറിയിച്ചു. കൊവിഡിനെ പ്രതിരോധിക്കാനായി 18 വയസിന് മുകളിലുള്ളവര്‍ക്ക് വാക്സിന് ഉപയോഗപ്രദമാവുമെന്ന് കേന്ദ്ര ആരോഗ്യമന്ത്രി ഡോ മൻസുഖ് മാണ്ഡവ്യ ട്വീറ്റ് ചെയ്തു. ഈ നടപടി കൊവിഡിനെതിരെയുള്ള കൂട്ടായ പരിശ്രമത്തെ കൂടുതല്‍ ശക്തിപ്പെടുത്തുമെന്നും അദ്ദേഹം പറഞ്ഞു.
പ്രധാനമന്ത്രി നരേന്ദ്ര മോദിയുടെ നേതൃത്വത്തില്‍ ഇന്ത്യയുടെ ശാസ്ത്രവും മാനവവിഭവ ശേഷിയും ഉപയോഗിച്ച് കൊവിഡ് വൈറസിനെ ഇല്ലാതാക്കുമെന്നും മന്ത്രി പറഞ്ഞു. രാജ്യത്ത് ആദ്യമായാണ് കൊവിഡ് പ്രതിരോധത്തിനായുള്ള നേസല്‍ വാക്സിന് അനുമതി ലഭിക്കുന്നത്.
