ന്യൂഡല്‍ഹി: ഒക്ടോബർ ഒന്ന് മുതൽ രാജ്യത്തെ ബാങ്കുകളില്‍ നിരവധി പുതിയ നിയമങ്ങളാണ് പ്രാബല്യത്തിൽ വരുന്നത്. ഉപഭോക്‌താക്കളുടെ അനുമതിയില്ലാതെ ഡെബിറ്റ്, ക്രെഡിറ്റ് കാര്‍ഡുകളില്‍ നിന്ന് ബാങ്കുകള്‍ക്ക് പണം ഈടാക്കാനാകില്ല (ഓട്ടോ ഡെബിറ്റ്). റിസര്‍വ് ബാങ്ക് ഓഫ് ഇന്ത്യയുടെ പുതിയ നിയമമനുസരിച്ച് ഓട്ടോ ഡെബിറ്റ് പെയ്‌മെന്‍റിന് 24 മണിക്കൂര്‍ മുന്‍പ് ഉപഭോക്താക്കള്‍ക്ക് മുന്നറിയിപ്പ് നല്‍കണം. ഉപഭോക്താക്കള്‍ സ്ഥിരീകരിച്ചാല്‍ മാത്രമേ ബാങ്കിന് അക്കൗണ്ടില്‍ നിന്ന് പണം ഈടാക്കാനാകൂ. എസ്‌എംഎസ് അല്ലെങ്കില്‍ ഇമെയില്‍ വഴി ഉപഭോക്താക്കളെ വിവരം അറിയിക്കാം.
യൂണിയന്‍ ബാങ്ക് ഓഫ് ഇന്ത്യ, ഓറിയന്‍റല്‍ ബാങ്ക് ഓഫ് കൊമേഴ്‌സ്, അലഹബാദ് ബാങ്ക് എന്നി ബാങ്കുകളിലെ പഴയ ചെക്ക് ബുക്കുകളും എംഐസിആര്‍ കോഡുകളും ഒക്ടോബര് ഒന്ന് മുതല്‍ ഉപയോഗിക്കാനാകില്ല. മൂന്ന് ബാങ്കുകളും മറ്റ് ബാങ്കുകളുമായി ലയിച്ചതിനാല്‍ അക്കൗണ്ട് നമ്പറുകള്‍, ഐഎഫ്എസ്‌സി, എംഐസിആര്‍ കോഡുകള്‍ മാറിയിട്ടുണ്ട്. ഇതിനാല്‍ പഴയ ചെക്ക് ബുക്കുകള്‍ അടുത്ത മാസം മുതല്‍ ഉപയോഗിക്കാനാകില്ല.
