ന്യൂഡൽഹി: കൊവിഡ് വ്യാപനം അതിരൂക്ഷമാകുന്ന സാഹചര്യത്തിൽ 24 മണിക്കൂറിനുള്ളിൽ ദേശീയ തലസ്ഥാനത്ത് എക്കാലത്തെയും ഉയർന്ന മരണനിരക്ക് രേഖപ്പെടുത്തി. 395 പേരാണ് വ്യാഴാഴ്‌ച മാത്രം കൊവിഡ് ബാധിച്ച് മരിച്ചത്. ഇതോടെ ആകെ മരണസംഖ്യ 15,772ആയി ഉയർന്നു.
കിടക്കകളുടെ ദൗർലഭ്യതയും മെഡിക്കൽ ഓക്‌സിജന്‍റെ അഭാവവും മൂലം ജനങ്ങൾ ദുരിതമനുഭവിക്കുന്ന സാഹചര്യമാണുള്ളത്. ഡൽഹിയിൽ ഓക്‌സിജന്‍റെ ലഭ്യതയിൽ ആശയക്കുഴപ്പമില്ലെന്ന മുഖ്യമന്ത്രി അരവിന്ദ് കെജ്‌രിവാളിന്‍റെ നിലപാടിന് പിന്നാലെയാണ് തലസ്ഥാനത്ത് ഏറ്റവും ഉയർന്ന ഏകദിന മരണസംഖ്യ രേഖപ്പെടുത്തിയത്.
അതേസമയം വ്യാഴാഴ്‌ച മാത്രം തലസ്ഥാനത്ത് 24,235 പേർക്കാണ് പുതുതായി കൊവിഡ് ബാധിച്ചത്. കഴിഞ്ഞ 24 മണിക്കൂറിനുള്ളിൽ 73,851സാമ്പിളുകളാണ് പരിശോധിച്ചത്. ഇതിൽ 32.82 ശതമാനം കൊവിഡ് പോസിറ്റീവ് ആണെന്ന് കണ്ടെത്തി. ബുധനാഴ്‌ച മുതൽ ഡൽഹിയിൽ 25,615 പേർ രോഗമുക്തരായി. നിലവിൽ സംസ്ഥാനത്ത് 97,977 സജീവ കൊവിഡ് രോഗികളുണ്ട്.
കൂടുതൽ വായനയ്‌ക്ക്: ജാഗ്രത കൈവിടരുത്, നാല് ലക്ഷത്തിനടുത്ത് രാജ്യത്തെ പ്രതിദിന കൊവിഡ് രോഗികള്‍
