ന്യൂഡൽഹി: ജമ്മു കശ്‌മീരിന് പ്രത്യേക പദവി നൽകുന്ന ഭരണഘടനയുടെ ആര്‍ട്ടിക്കിള്‍ 370 റദ്ദാക്കിയതിനെ ചോദ്യം ചെയ്യുന്ന ഒരു കൂട്ടം ഹര്‍ജികളില്‍ സുപ്രീം കോടതിയിൽ വാദം നടക്കുന്നു. ചീഫ് ജസ്റ്റിസ് ഡി വൈ ചന്ദ്രചൂഡിന്‍റെ നേതൃത്വത്തില്‍, ജസ്റ്റിസുമാരായ എസ് കെ കൗൾ, സഞ്ജീവ് ഖന്ന, ബി ആർ ഗവായ്, സൂര്യകാന്ത് എന്നിവരടങ്ങിയ അഞ്ചംഗ ബെഞ്ചാണ് ഹർജികൾ പരിഗണിക്കുന്നത്. ഭരണഘടനയുടെ 370-ാം അനുച്ഛേദം ശാശ്വതമായ ഒരു സവിശേഷത നേടിയിട്ടുണ്ടോ എന്നത് തർക്കവിഷയമാണെന്ന് മുതിർന്ന അഭിഭാഷകൻ കപിൽ സിബലിനോട് സുപ്രീം കോടതി പറഞ്ഞു.
തർക്ക വിഷയം എന്നതിനാൽ തന്നെ ഇരുപക്ഷവും കേസ് വാദിക്കുമെന്നും നടപടിക്രമങ്ങൾ പാലിച്ചിട്ടുണ്ടോ ഇല്ലയോ എന്നതിലും തർക്കമുണ്ടാകുമെന്നും ജസ്റ്റിസ് എസ് കെ കൗൾ പറഞ്ഞു. അതേസമയം ഭരണഘടനയുടെ 370-ാം അനുച്ഛേദം ശാശ്വതമാണെന്ന് ബോധ്യപ്പെടുത്താൻ ശ്രമിക്കുമെന്നും, ഇത് സംവാദാത്മകമാണെന്നതിൽ യാതൊരു സംശയവുമില്ലെന്നും കപിൽ സിബിൽ മറുപടി നൽകി. ആർട്ടിക്കിൾ 370 മൂന്ന് ഭാഗങ്ങളായാണെന്ന് ഹർജിക്കാരിൽ ഒരാളെ പ്രതിനിധീകരിച്ച് മുതിർന്ന അഭിഭാഷകൻ ഗോപാൽ ശങ്കരനാരായണൻ പറഞ്ഞു.
ഞങ്ങളുടെ വാദത്തിന്‍റെ ആദ്യഭാഗം ഇത് എല്ലായ്‌പ്പോഴും തുടരും, ഇത് ക്ഷണികമാണ്, കാരണം ഭരണഘടന അസംബ്ലി വരുന്നതിന് മുമ്പ് എന്താണ് സംഭവിക്കുന്നത്, ഭരണഘടന അസംബ്ലി അംഗീകരിക്കേണ്ടതുണ്ട്. ഗോപാൽ ശങ്കരനാരായണൻ പറഞ്ഞു. ഭരണഘടന (ജമ്മു കശ്‌മീരിലേക്കുള്ള അപേക്ഷ) ഉത്തരവ്, 1954 ഭരണഘടനാ അസംബ്ലി നിലവിലിരിക്കെയാണ് പ്രഖ്യാപിച്ചതെന്നും അവർക്ക് വേണമെങ്കിൽ ആർട്ടിക്കിൾ 370 റദ്ദാക്കാമായിരുന്നുവെന്നും സിബൽ മറുപടി നൽകി. 1951ലാണ് അസംബ്ലി സ്ഥാപിതമായത്. അവർക്ക് ഒരു തെരഞ്ഞെടുപ്പുണ്ടായിരുന്നു. 370 റദ്ദാക്കി മറ്റേതൊരു സംസ്ഥാനത്തേയും പോലെ ഇന്ത്യയുടെ ഭാഗമാകാൻ ആഗ്രഹിക്കുന്നു എന്ന് അവർക്ക് പറയാമായിരുന്നെന്നും സിബൽ പറഞ്ഞു.
വീണ്ടും സഭ രൂപീകരിക്കാത്തിടത്തോളം 370–ാം വകുപ്പിലെ അധികാരം രാഷ്ട്രപതിക്ക് പ്രയോഗിക്കാനാവില്ലെന്നും കപിൽ സിബൽ പറഞ്ഞു. കേന്ദ്ര സർക്കാരിന്‍റെ രാഷ്ട്രീയ നടപടി, ക്രമപ്രകാരമല്ലെന്നും ഇത്തരമൊരു നടപടി പാർലമെന്‍റിന് കൈക്കൊള്ളാൻ കഴിയില്ലെന്നും സിബൽ വാദിച്ചു. ഭരണഘടനയിലെ വ്യവസ്ഥകൾ ജമ്മു കശ്‌മീരിൽ തെരഞ്ഞെടുത്ത് പ്രയോഗിക്കുക എന്നതാണ് ഭരണഘടന സമ്പ്രദായം പിന്തുടരുന്നതെന്ന് സിബൽ ചൂണ്ടിക്കാണിച്ചത് ശരിയാണെന്ന് ചീഫ് ജസ്റ്റിസ് നിരീക്ഷിച്ചു. ബാധകമാക്കുന്നത് പോലെ എല്ലാ വ്യവസ്ഥകളും ഒരിക്കലും പരിഗണിച്ചിട്ടില്ലെന്നും നിയമത്തിന്‍റെ ഈ വശത്തെക്കുറിച്ച് കോടതി ഇന്ത്യൻ അറ്റോർണി ജനറലിനെ കേൾക്കേണ്ടതുണ്ടെന്നും ജസ്റ്റിസ് ചന്ദ്രചൂഡ് ചൂണ്ടിക്കാട്ടി.
ഹർജികളിൽ തിങ്കള്‍, വെള്ളി ഒഴികെ എല്ലാ ദിവസവും വാദം കേള്‍ക്കല്‍ തുടരും. 2019 ഓഗസ്റ്റ് അഞ്ചിനാണ് കശ്‌മീരിന് പ്രത്യേക പദവി നല്‍കുന്ന ആര്‍ട്ടിക്കിള്‍ 370 റദ്ദാക്കിയത്. വിജ്ഞാപനത്തിന് ശേഷം നാല് വര്‍ഷത്തിന് ശേഷമാണ് സുപ്രീംകോടതിയില്‍ വാദം കേള്‍ക്കുന്നത്. പ്രത്യേക പദവി എടുത്ത് കളയുകയും ജമ്മു കശ്‌മീരിനെ രണ്ട് കേന്ദ്ര ഭരണ പ്രദേശങ്ങളായി വിഭജിക്കപ്പെടുകയും ചെയ്‌തിരുന്നു. സംഭവവുമായി ബന്ധപ്പെട്ട് ആർട്ടിക്കിൾ 370, ജമ്മു കശ്‌മീർ പുനസംഘടന നിയമം 2019 എന്നിവയുടെ വ്യവസ്ഥകൾ റദ്ദാക്കിയതിനെ ചോദ്യം ചെയ്യുന്ന നിരവധി ഹർജികൾ 2019ൽ ഭരണഘടന ബെഞ്ചിന് വിട്ടിരുന്നു.
