അമരാവതി: അഴിമതിക്കേസില്‍ ജയിലില്‍ കഴിയുന്ന ആന്ധ്രാപ്രദേശ് മുന്‍ മുഖ്യമന്ത്രിയും ടിഡിപി (TDP) നേതാവുമായ എന്‍ ചന്ദ്രബാബു നായിഡുവിന് ഇടക്കാല ജാമ്യം (Interim Bail To Chandrababu Naidu). നാല് ആഴ്‌ചത്തെ ഇടക്കാല ജാമ്യമാണ് ആന്ധ്രാപ്രദേശ് ഹൈക്കോടതി (Andhra Pradesh High Court) ചന്ദ്രബാബു നായിഡുവിന് അനുവദിച്ചിരിക്കുന്നത്. 2021ല്‍ എഫ്‌ഐആര്‍ രജിസ്റ്റര്‍ ചെയ്‌ത സ്‌കില്‍ ഡെവലപ്മെന്‍റ് കേസില്‍ (Skill Development Case) കഴിഞ്ഞ സെപ്‌റ്റംബര്‍ 9നാണ് ചന്ദ്രബാബു നായിഡു അറസ്റ്റിലായത്. നിലവില്‍ രാജമഹേന്ദ്രവാരം സെന്‍ട്രല്‍ ജയിലിലാണ് (Rajamahendravaram Central Prison) അദ്ദേഹം.
നാടകീയ നീക്കങ്ങള്‍ക്കൊടുവിലായിരുന്നു കേസില്‍ ചന്ദ്രബാബു നായിഡുവിന്‍റെ അറസ്റ്റ്. സെപ്‌റ്റംബര്‍ 9ന് പുലര്‍ച്ചയോടെയാണ് നന്ദ്യാല്‍ പൊലീസ് ടിഡിപി അധ്യക്ഷന്‍ കൂടിയായ ചന്ദ്രബാബുവിനെ കസ്റ്റഡിയിലെടുത്തത്. പൊലീസിലെ ഉന്നത ഉദ്യോഗസ്ഥരും ക്രൈം ഇന്‍വെസ്റ്റിഗേഷന്‍ ഡിപ്പാര്‍ട്ട്മെന്‍റും ചേര്‍ന്നായിരുന്നു അദ്ദേഹത്തെ കസ്റ്റഡിയിലെടുത്തത്.
അന്വേഷണ സംഘം എത്തിയ സമയത്ത് ആര്‍കെ ഹാളിന് പുറത്ത് തന്‍റെ കാരവാനില്‍ വിശ്രമത്തിലായിരുന്നു അദ്ദേഹം. ചന്ദ്രബാബു നായിഡുവിന്‍റെ അറസ്റ്റിനെതിരെ പ്രദേശത്ത് വ്യാപക പ്രതിഷേധവുമുണ്ടായി. കേസില്‍ ആദ്യം പൊലീസ് സമര്‍പ്പിച്ച എഫ്‌ഐആറില്‍ ചന്ദ്രബാബു നായിഡുവിന്‍റെ പേരില്ലെന്നും അതുകൊണ്ട് അറസ്റ്റ് ചെയ്യാന്‍ സാധിക്കില്ലെന്നും അദ്ദേഹത്തിന്‍റെ അഭിഭാഷകര്‍ വാദിച്ചെങ്കിലും അറസ്റ്റില്‍ നിന്നും പിന്നിലേക്ക് പോകാന്‍ അന്വേഷണ സംഘം തയ്യാറായിരുന്നില്ല. തുടര്‍ന്ന് വിജയവാഡയില്‍ നിന്നും അദ്ദേഹത്തെ രാജമഹേന്ദ്രവാരം സെന്‍ട്രല്‍ ജയിലിലേക്ക് മാറ്റുകയായിരുന്നു.
സംസ്ഥാന നൈപുണ്യ വികസന കോര്‍പ്പറേഷനുമായി (AP Skill Development Corporation) ചേര്‍ന്ന് കൊണ്ട് മുന്‍ മുഖ്യ മന്ത്രിയായ ചന്ദ്രബാബു നായിഡു 250 കോടിയോളം രൂപയുടെ അഴിമതി നടത്തി എന്നാതാണ് കേസ്. 2015-ല്‍ തയ്യാറാക്കിയ പദ്ധതിക്ക് വേണ്ടി 3,350 കോടിയുടെ കരാര്‍ ജര്‍മന്‍ കമ്പനിയുമായി ആന്ധ്രാപ്രദേശ് സര്‍ക്കാര്‍ ഒപ്പിട്ടിരുന്നു. അന്ന് മുഖ്യമന്ത്രിയായിരുന്ന ചന്ദ്രബാബു നായിഡുവിന്‍റെ നേതൃത്വത്തിലുണ്ടായിരുന്ന സര്‍ക്കാര്‍ ഈ തുകയില്‍ നിന്ന് കോടികള്‍ വകമാറ്റി എന്നായിരുന്നു അന്വേഷണ സംഘം കണ്ടെത്തിയത്.
അതേസമയം, ആന്ധ്ര മുഖ്യമന്ത്രി വൈ എസ് ജഗന്‍ മോഹന്‍ റെഡ്ഡി പ്രതിപക്ഷത്തെ അടിച്ചമര്‍ത്താനുള്ള ശ്രമമാണ് ചന്ദ്രബാബു നായിഡുവിന്‍റെ അറസ്റ്റിലൂടെ നടത്തുന്നതെന്ന് അദ്ദേഹത്തിന്‍റെ മകനും മുന്‍ മന്ത്രിയുമായ നാരാ ലോകേഷ് (Nara Lokesh Against Jagan Reddy) ആരോപിച്ചിരുന്നു.
