പൂനെ : എയർ ഏഷ്യ വിമാനത്തിന്‍റെ ടയറുകളിൽ ഒന്ന് പൊട്ടിയതിനെ തുടർന്ന് സർവീസ് നിർത്തിവച്ചു. ഞായറാഴ്‌ച ബെംഗളൂരുവിൽ നിന്ന് പൂനെയിലേക്ക് യാത്ര തിരിച്ച വിമാനത്തിന്‍റെ ടയറാണ് പൊട്ടിയ നിലയിൽ കണ്ടെത്തിയത്. ബെംഗളൂരുവിൽ നിന്ന് ടേക്ക് ഓഫ് ചെയ്‌ത് പൂനെയില്‍ വിമാനമിറങ്ങിയിരുന്നു.
എന്നാല്‍ ബെംഗളൂരു വിമാനത്താവളത്തിലെ റണ്‍വേയില്‍ നിന്ന് ടയറിന്‍റെ കഷണങ്ങള്‍ ലഭിച്ചു. ഇതിനിടെ പൂനെയിലെത്തിയ വിമാനം പരിശോധനയ്ക്ക് വിധേയമാക്കിയപ്പോള്‍ മൂന്നാം നമ്പർ ടയറിന്‍റെ വശത്തായി പൊട്ടൽ സ്ഥിരീകരിച്ചു. ഇതേ തുടര്‍ന്ന് വിമാനത്തിന്‍റെ തുടർന്നുള്ള സർവീസുകൾ നിര്‍ത്തിവയ്ക്കാന്‍ ഡയറക്‌ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) ഉത്തരവിടുകയായിരുന്നു.
