ലക്‌നൗ : യുപിയില്‍ ലൈംഗിക അതിക്രമ പരാതി പിന്‍വലിക്കാത്തതിന്‍റെ പേരില്‍ ദമ്പതികള്‍ക്ക് നേരെ ആസിഡ് ആക്രമണം. തിങ്കളാഴ്‌ച രാത്രിയോടെയാണ് സംഭവം. വീട്ടില്‍ കിടന്നുറങ്ങുകയായിരുന്ന നന്ദ്‌ഹി ലാല്‍ (42), ഭാര്യ ലക്ഷ്‌മി (40) എന്നിവര്‍ക്ക് നേരെയാണ് ആക്രമണമുണ്ടായത്.
മകള്‍ക്കുനേരെ ലൈംഗികാതിക്രമം നടത്തിയെന്ന് ആരോപിച്ച് ഇവര്‍ രാജേഷ്‌ എന്നയാള്‍ക്കെതിരെ പൊലീസില്‍ പരാതി നല്‍കിയിരുന്നു. ഇത് പിന്‍വലിക്കണമെന്ന് ആവശ്യപ്പെട്ടായിരുന്നു ആക്രമണം. രാത്രി അഞ്ചംഗ സംഘം വീട്ടില്‍ അതിക്രമിച്ചുകയറി ദമ്പതികള്‍ക്ക് നേരെ ആസിഡ് ഒഴിക്കുകയായിരുന്നു.
Also Read: പ്രണയം വീട്ടുകാരെതിര്‍ത്തു: യുവതിയെ വെടിവച്ച് കൊന്ന് യുവാവ് സ്വയം നിറയൊഴിച്ചു
സംഭവത്തിലുള്‍പ്പെട്ടവരെ തിരിച്ചറിഞ്ഞതായി പൊലീസ് അറിയിച്ചു. പിലിഭിത്‌ അഗ്യാരി സ്വദേശികളായ അജയ്‌, ഛോട്ടേലാല്‍, രാമകൃഷ്‌ണ, ഗുണ്ടു, ഹരിശങ്കര്‍ എന്നിവരാണ് പ്രതികള്‍. ഇതില്‍ മൂന്ന് പേരെ പൊലീസ് അറസ്റ്റ് ചെയ്‌തു. ബാക്കിയുള്ളവര്‍ക്കായി തിരച്ചില്‍ ശക്തമാക്കിയതായി പൊലീസ് അറിയിച്ചു. ഗുരുതരമായി പരിക്കേറ്റ ദമ്പതികളെ സമീപത്തെ സ്വകാര്യ ആശുപത്രിയില്‍ പ്രവേശിപ്പിച്ചു.
