വാറങ്കല്‍: ഭര്‍ത്താവ് മരിച്ച് പതിനൊന്ന് മാസങ്ങള്‍ക്ക് ശേഷം ഭാര്യ ഗര്‍ഭിണിയാകുന്നു. ഇപ്പോള്‍ അവര്‍ക്ക് ഒരു കുഞ്ഞും ജനിച്ചിരിക്കുന്നു. കുഞ്ഞിന്‍റെ അച്ഛന്‍ മരണപ്പെട്ട് പോയ ആ ഭര്‍ത്താവ് തന്നെ. ആധുനിക വൈദ്യ ശാസ്ത്രമാണ് തെലങ്കാനയിലെ മഞ്ചേരിയയിലെ ഈ യുവതിക്ക് ഇത്തരമൊരു ഗര്‍ഭധാരണവും പ്രസവവും സാധ്യമാക്കിയത്.
2013ലാണ് ഇവര്‍ വിവാഹിതയായത്. എന്നാല്‍ ഏഴ് വര്‍ഷം കഴിഞ്ഞിട്ടും കുഞ്ഞുണ്ടാവാത്തത്തിനെ തുടര്‍ന്ന് 2020ല്‍ ഇവരും ഭര്‍ത്താവും വാറങ്കലിലെ ഒരു ആശുപത്രിയില്‍ ചികിത്സ തേടുകയായിരുന്നു. എന്നാല്‍ ചികിത്സയ്ക്കിടെ കൊവിഡ് ബാധിച്ച് ഇവരുടെ ഭര്‍ത്താവ് 2021ല്‍ മരണപ്പെട്ടു. മാനസികമായി ഏറെ തകര്‍ന്ന ഇവരുടെ മനസില്‍ പ്രതീക്ഷയുടെ ചെറുകിരണങ്ങള്‍ മൊട്ടിട്ടു വന്നു.
ഭര്‍ത്താവിന്‍റെ ബീജവും ഇവരുടെ അണ്ഡവും ഗര്‍ഭധാരണത്തിനായി ഇവര്‍ ചികിത്സ തേടിയ വാറങ്കലിലെ ആശുപത്രിയില്‍ സുക്ഷിച്ച് വച്ചിട്ടുള്ളതുകൊണ്ട് തന്നെ ഇന്‍ വിട്രോ ഫെര്‍ട്ടിലൈസേഷനിലൂടെ(IVF) കുഞ്ഞിനെ പ്രസവിക്കാം എന്ന ചിന്ത ഇവരുടെ മനസില്‍ ഉദിക്കുകയായിരുന്നു. ഇതിനായി ഇവര്‍ ഹൈക്കോടതിയെ സമീപിച്ച് അനുമതി തേടി. ഐവിഎഫ് ഇവരില്‍ ആരംഭിച്ചത് കഴിഞ്ഞ വര്‍ഷം ഓഗസ്റ്റിലാണ്. ഇക്കഴിഞ്ഞ മാര്‍ച്ച് അവസാന വാരം ഇവര്‍ക്ക് ആണ്‍കുഞ്ഞ് ജനിച്ചു.
സ്വകാര്യത മാനിച്ച് സ്ത്രീയുടെയോ പുരുഷന്‍റെയോ മറ്റ് വിവരങ്ങള്‍ നല്‍കുന്നില്ല
ALSO READ: പുരുഷന്‍മാരുടെ ശ്രദ്ധയ്ക്ക്: വ്യായാമക്കുറവ് നിങ്ങളുടെ ലൈംഗിക ആരോഗ്യത്തെ ബാധിക്കുമെന്ന് പഠനങ്ങൾ
