ബെംഗളൂരു: കെമ്പഗൗഡ അന്താരാഷ്‌ട്ര വിമാനത്താവളത്തിന് സമീപം ഉണ്ടായ സ്‌ഫോടനത്തിൽ ആറു തൊഴിലാളികൾക്ക് പരിക്കേറ്റു.വിമാനത്താവളത്തിലെ രണ്ടാമത്തെ ടെർമിനലിന്‍റെ അണ്ടർപാസിന് സമീപമുള്ള പ്ലാസ്‌റ്റിക് മെഷീനിലാണ് സ്‌ഫോടനം ഉണ്ടായത്. പരിക്കേറ്റ തൊഴിലാളികളിൽ അജയ് കുമാർ, സിറാജ് എന്നിവർക്ക് 40 ശതമാനം പൊള്ളലേറ്റു. ഇവരുടെ നില ഗുരുതരമാണെന്ന് എയർപോർട്ട് പൊലീസ് പറഞ്ഞു. പരിക്കേറ്റ അവിനാശ്, ഗൗതം, പ്രശാന്ത്, നാഗേശ് എന്നിവരെ വിക്‌ടോറിയ ആശുപത്രിയിൽ പ്രവേശിപ്പിച്ചു.
അതേ സമയം എയർപോർട്ട് ടെർമിനലിലേക്ക് പോകുന്ന റോഡുകളിൽ സീബ്ര ക്രോസിംഗും അടയാളങ്ങളും വരയ്‌ക്കാൻ തൊഴിലാളികൾ തെർമോപ്ലാസ്‌റ്റിക് റോഡ് മാർക്കിങ് യന്ത്രം ഉപയോഗിക്കാറുണ്ടെന്ന് പൊലീസ് പറഞ്ഞു. എന്നാൽ അപകടത്തിന്‍റെ യഥാർത്ഥ കാരണം ഇതുവരെ മനസിലായിട്ടില്ലെന്ന് പൊലീസ് അറിയിച്ചു.
