ഭോപ്പാല്‍: കൃത്യമായ അളവില്‍ ഓക്സിജന്‍ ലഭിക്കാത്തതിനെ തുടര്‍ന്ന് മധ്യപ്രദേശ് ഷാഡോളിലെ സർക്കാർ ആശുപത്രിയില്‍ കൊവിഡ് രോഗികൾ മരിച്ചു. തീവ്രപരിചരണ വിഭാഗത്തില്‍ പ്രവേശിപ്പിക്കപ്പെട്ട 62 രോഗികളില്‍ 6 പേരാണ് മരിച്ചത്. ശനിയാഴ്ച രാത്രിയും ഞായറാഴ്ചയുമായാണ് മരണം സ്ഥിരീകരിച്ചത്. മറ്റ് രോഗികള്‍ സുരക്ഷിതരാണെന്ന് ആശുപത്രി അധികൃതര്‍ അറിയിച്ചു.
ഓക്സിജന്‍ വിതരണക്കാരെ നിരന്തരം വിളിച്ചതായും, എന്നാല്‍ അവ കൊണ്ടുവരുന്ന വാഹനം കൃത്യസമയത്ത് എത്താത്തതുമാണ് ദുരന്തത്തിന് കാരണമായതെന്ന് ആശുപത്രി ഡീന്‍ ഡോ. മിലിന്ദ് ഷിരാൽക്കർ പറഞ്ഞു. കഴിഞ്ഞ രണ്ട് ദിവസങ്ങളായി ആശുപത്രിയില്‍ ഓക്സിജന്‍ ലഭ്യതക്കുറവ് ഉണ്ടായിരുന്നതായും അദ്ദേഹം കൂട്ടിച്ചേര്‍ത്തു.
Also Read: ഓക്സിജന്‍ ട്യൂബ് മാറ്റി വച്ചു: മധ്യപ്രദേശില്‍ കൊവിഡ് രോഗി ശ്വാസം കിട്ടാതെ മരിച്ചു
അതേസമയം, ഓക്സിജന്‍റെ അഭാവം മൂലം സംസ്ഥാനത്ത് എത്രപേര്‍ ഇങ്ങനെ മരണപ്പെടുമെന്നും എന്തുകൊണ്ടാണ് സര്‍ക്കാര്‍ ഉണര്‍ന്നുപ്രവര്‍ത്തിക്കാത്തതെന്നും മധ്യപ്രദേശ് കോൺഗ്രസ് പ്രസിഡന്‍റ് കമൽ നാഥ് ചോദിച്ചു. സംസ്ഥാനത്ത് റെംഡെസിവിർ മരുന്നുകളുടെ ക്ഷാമമുണ്ടെന്നും അദ്ദേഹം ട്വീറ്റ് ചെയ്തു. ഇക്കാര്യത്തില്‍ സര്‍ക്കാര്‍ ഇതുവരെ പ്രതികരിച്ചിട്ടില്ല.
Also Read: മഹാരാഷ്ട്രയില്‍ സൗജന്യ ഓക്സിജന്‍ വിതരണത്തിനൊരുങ്ങി റിലയന്‍സ്
24 മണിക്കൂറിനിടെ 142 പുതിയ കൊവിഡ് കേസുകളാണ് ഷാഡോളില്‍ റിപ്പോര്‍ട്ട് ചെയ്തത്. ഇതോടെ ജില്ലയിലെ മൊത്തം രോഗികളുടെ എണ്ണം 4,528 ആയി. 38 മരണങ്ങളാണ് ജില്ലയില്‍ ഇതുവരെയുണ്ടായത്.
