ಹೊಗೆನಕಲ್ ಕಾವೇರಿ ಒಳಹರಿವು ಇಳಿಮುಖ: ಎರಡು ದಿನ‌ ದಿಢೀರ್ ಹೆಚ್ಚಿದ್ದ ನೀರಿನ ಮಟ್ಟ

ಚಾಮರಾಜನಗರ : ಕರ್ನಾಟಕ ಮತ್ತು ತಮಿಳುನಾಡು ಗಡಿಯಲ್ಲಿ ಕಾವೇರಿಯು ಜಲವೈಯ್ಯಾರ ಸೃಷ್ಟಿಸುವ ಹೊಗೆನಕಲ್ ಜಲಪಾತದಲ್ಲಿ ದಿಢೀರ್ ನೀರಿನ ಮಟ್ಟ ಹೆಚ್ಚಾಗಿ ಈಗ ಮತ್ತೆ ಇಳಿಕೆ ಕಂಡಿದೆ. ತಮಿಳುನಾಡಿನ ಬಿಳಿಗುಂಡ್ಲು ಸಿಬ್ಬಂದಿ ಮಾಹಿತಿ ಪ್ರಕಾರ, ಬುಧವಾರ 4 ಸಾವಿರ ಘನ ಅಡಿಗೆ ಏರಿತ್ತು. ಗುರುವಾರ 2,800 ಘನ ಅಡಿ ಇದ್ದ ನೀರಿನ ಮಟ್ಟ ಈಗ 1200ಕ್ಕೆ ಇಳಿದಿದೆ.

ಹೊಗೆನಕಲ್​ನಲ್ಲಿ ದಿಢೀರ್ ನೀರಿನ ಮಟ್ಟ ಏರಿಕೆ ಕಂಡು ಸ್ಥಳೀಯರು, ಪ್ರವಾಸಿಗರು ಅವಾಕ್ಕಾಗುವ ಜೊತೆ ಜಲವೈಯ್ಯಾರವನ್ನು ಕಳೆದ ಎರಡು‌ ದಿನ ಕಣ್ತುಂಬಿಕೊಂಡಿದ್ದಾರೆ.

ಹೊಗೆನಕಲ್ ಜಲಪಾತದ ಬಗ್ಗೆ ಒಂದಿಷ್ಟು : ಹೊಗೆನಕಲ್ ಜಲಪಾತವು ದಕ್ಷಿಣ ಭಾರತದ ಕಾವೇರಿ ನದಿಗೆ ಸೇರಿದೆ. ಇದು ದಕ್ಷಿಣ ಭಾರತದ ತಮಿಳುನಾಡು ರಾಜ್ಯದ ಧರ್ಮಪುರಿ ಜಿಲ್ಲೆಯಲ್ಲಿದೆ. ಬೆಂಗಳೂರಿನಿಂದ ಸುಮಾರು 180 ಕಿ.ಮೀ ದೂರದಲ್ಲಿ ಈ ಜಲಪಾತ ಕಂಡುಬರುತ್ತದೆ. ಭಾರತದ "ನಯಾಗರ ಜಲಪಾತ"ವೆಂದೇ ಹೊಗೆನಕಲ್ ಸುಪ್ರಸಿದ್ಧವಾಗಿದೆ. ಬಂಡೆಗಳ ಮೇಲೆ ಅಪ್ಪಳಿಸುವ ನೀರು ಹೊಗೆಯಂತೆ ಹೊರಹೊಮ್ಮುತ್ತದೆ. ಆದ್ದರಿಂದ ಇದಕ್ಕೆ "ಹೊಗೆನಕಲ್" ಎಂಬ ಹೆಸರು ಬಂದಿದೆ. ಹೊಗೆನಕಲ್ ಜಲಪಾತ ಕರ್ನಾಟಕ-ತಮಿಳುನಾಡು ರಾಜ್ಯಗಳ ಗಡಿಯಲ್ಲಿದೆ.

ಇದನ್ನೂ ಓದಿ: ಹೊರಹರಿವು ಹೆಚ್ಚಳ: ಹೊಗೆನಕಲ್​ನಲ್ಲಿ ಕಾವೇರಿ ಜಲವೈಯಾರ