ನವದೆಹಲಿ: ಕಂಪ್ಯೂಟರ್ ಚಿಪ್ ತಯಾರಕ ಕಂಪನಿ ಮೀಡಿಯಾಟೆಕ್ ಗುರುವಾರ ಹೈಟೆಕ್ ಮೊಬೈಲ್ ಗೇಮಿಂಗ್ಗಾಗಿ ಡೈಮೆನ್ಸಿಟಿ 7300 ಮತ್ತು ಡೈಮೆನ್ಸಿಟಿ 7300 ಎಕ್ಸ್ ಎಂಬ 4 ಎನ್ಎಂ ಚಿಪ್ಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ.
ಡೈಮೆನ್ಸಿಟಿ 7300 ಚಿಪ್ಸೆಟ್ಗಳು ಮಲ್ಟಿಟಾಸ್ಕಿಂಗ್, ಉತ್ತಮ ಛಾಯಾಗ್ರಹಣ, ವೇಗವರ್ಧಿತ ಗೇಮಿಂಗ್ ಮತ್ತು ಎಐ-ವರ್ಧಿತ ಕಂಪ್ಯೂಟಿಂಗ್ಗಾಗಿ ತಯಾರಿಸಲಾಗಿದ್ದರೆ, ಡೈಮೆನ್ಸಿಟಿ 7300 ಎಕ್ಸ್ ಅನ್ನು ಫ್ಲಿಪ್-ಶೈಲಿಯ ಮಡಚಬಹುದಾದ ಸಾಧನಗಳನ್ನು ಗಮನದಲ್ಲಿಟ್ಟುಕೊಂಡು ವಿನ್ಯಾಸಗೊಳಿಸಲಾಗಿದೆ. ಇದು ಡ್ಯುಯಲ್ ಡಿಸ್ ಪ್ಲೇಗಳಿಗೆ ಬೆಂಬಲ ನೀಡುತ್ತದೆ ಎಂದು ಕಂಪನಿ ಹೇಳಿಕೆಯಲ್ಲಿ ತಿಳಿಸಿದೆ.
"ಇತ್ತೀಚಿನ ಎಐ ಆವಿಷ್ಕಾರಗಳು ಮತ್ತು ಸಂಪರ್ಕ ವೈಶಿಷ್ಟ್ಯಗಳನ್ನು ಸಂಯೋಜಿಸಲು ಮೀಡಿಯಾಟೆಕ್ ಡೈಮೆನ್ಸಿಟಿ 7300 ಚಿಪ್ಗಳು ಪ್ರಮುಖ ಪಾತ್ರ ವಹಿಸಲಿವೆ. ಇದರಿಂದಾಗಿ ಗ್ರಾಹಕರು ತಡೆರಹಿತವಾಗಿ ಸ್ಟ್ರೀಮ್ ಮಾಡಬಹುದು ಮತ್ತು ಗೇಮಿಂಗ್ ಮಾಡಬಹುದು" ಎಂದು ಮೀಡಿಯಾಟೆಕ್ನ ವೈರ್ಲೆಸ್ ಸಂವಹನ ವ್ಯವಹಾರದ ಉಪ ಪ್ರಧಾನ ವ್ಯವಸ್ಥಾಪಕ ಡಾ.ಯೆಂಚೀ ಲೀ ಹೇಳಿದರು.
ಎರಡೂ ಚಿಪ್ ಸೆಟ್ ಗಳು ಆಕ್ಟಾ-ಕೋರ್ ಸಿಪಿಯು ಅನ್ನು ಹೊಂದಿದ್ದು, 4 ಪಟ್ಟು ಆರ್ಮ್ ಕಾರ್ಟೆಕ್ಸ್-ಎ 78 ಕೋರ್ಗಳನ್ನು ಒಳಗೊಂಡಿವೆ. ಇವು 2.5 ಗಿಗಾಹರ್ಟ್ಸ್‌ವರೆಗೆ ಕಾರ್ಯನಿರ್ವಹಿಸುತ್ತವೆ ಮತ್ತು 4 ಎಕ್ಸ್ ಆರ್ಮ್ ಕಾರ್ಟೆಕ್ಸ್-ಎ 55 ಕೋರ್ಗಳೊಂದಿಗೆ ಜೋಡಿಸಲ್ಪಟ್ಟಿವೆ.
ಇತರ ಕಂಪನಿಯ ಇದೇ ಮಾದರಿಯ ಚಿಪ್ಸೆಟ್ಗಳಿಗೆ ಹೋಲಿಸಿದರೆ, ಡೈಮೆನ್ಸಿಟಿ 7300 ಸರಣಿಯು ಶೇಕಡಾ 20ರಷ್ಟು ವೇಗದ ಎಫ್ಪಿಎಸ್ ಮತ್ತು ಶೇಕಡಾ 20ರಷ್ಟು ಸುಧಾರಿತ ಇಂಧನ ದಕ್ಷತೆಯನ್ನು ನೀಡುತ್ತದೆ. ಡೈಮೆನ್ಸಿಟಿ 7300 ಚಿಪ್ಸೆಟ್ಗಳು ಮೀಡಿಯಾಟೆಕ್ ಇಮೇಜಿಂಗ್ 950 ಯೊಂದಿಗೆ ಸುಧಾರಿತ ಛಾಯಾಗ್ರಹಣದ ಅನುಭವವನ್ನು ಸಹ ನೀಡುತ್ತವೆ. ಇದು ಪ್ರೀಮಿಯಂ-ಗ್ರೇಡ್ 12-ಬಿಟ್ ಎಚ್ಡಿಆರ್ -ಐಎಸ್ಪಿಯೊಂದಿಗೆ 200 ಎಂಪಿ ಮುಖ್ಯ ಕ್ಯಾಮೆರಾವನ್ನು ಒಳಗೊಂಡಿದೆ.
ಫೇಸ್ ಡಿಟೆಕ್ಷನ್ (ಎಚ್ಡಬ್ಲ್ಯೂಎಫ್ಡಿ) ಮತ್ತು ವೀಡಿಯೊ ಎಚ್ಡಿಆರ್ ಒದಗಿಸುವ ಹೊಸ ಹಾರ್ಡ್ವೇರ್ ಎಂಜಿನ್ಗಳೊಂದಿಗೆ ವರ್ಧಿತವಾದ ಡೈಮೆನ್ಸಿಟಿ 7300 ಬಳಕೆದಾರರಿಗೆ ಕಡಿಮೆ ಬೆಳಕಿನಲ್ಲಿಯೂ ಅದ್ಭುತ ಚಿತ್ರಗಳು ಮತ್ತು ವೀಡಿಯೊಗಳನ್ನು ಸೆರೆಹಿಡಿಯಲು ಅನುವು ಮಾಡಿಕೊಡುತ್ತದೆ ಎಂದು ಕಂಪನಿ ತಿಳಿಸಿದೆ.
ಮೀಡಿಯಾಟೆಕ್ ತೈವಾನ್ನ ಪ್ರಮುಖ ಚಿಪ್ ತಯಾರಕ ಕಂಪನಿಯಾಗಿದ್ದು, ಸ್ಮಾರ್ಟ್ಫೋನ್ಗಳು, ಫ್ಲಾಟ್-ಸ್ಕ್ರೀನ್ ಟಿವಿಗಳು ಮತ್ತು ಇತರ ಎಲೆಕ್ಟ್ರಾನಿಕ್ ಸಾಧನಗಳಿಗೆ ಅಗತ್ಯವಾದ ದೊಡ್ಡ ಪ್ರಮಾಣದ ಪ್ರೊಸೆಸರ್ಗಳನ್ನು ಒದಗಿಸುತ್ತದೆ. ಕಡಿಮೆ ಬೆಲೆಯ ಚಿಪ್ಗಳನ್ನು ಪೂರೈಸುವುದು ಕಂಪನಿಯ ಹೆಗ್ಗಳಿಕೆಯಾಗಿದೆ.
ಇದನ್ನೂ ಓದಿ : 50 MP ಕ್ಯಾಮೆರಾದೊಂದಿಗೆ ಸ್ಯಾಮ್ಸಂಗ್ Galaxy F 55 ಸ್ಮಾರ್ಟ್ಫೋನ್ ಬಿಡುಗಡೆ: ಬೆಲೆ ಎಷ್ಟು ಗೊತ್ತಾ? - Samsung launches Galaxy F55
