ನವದೆಹಲಿ : ಪಿಸಿ ಮತ್ತು ಪ್ರಿಂಟರ್ಗಳನ್ನು ತಯಾರಿಸುವ ಪ್ರಖ್ಯಾತ ಕಂಪನಿ ಎಚ್ಪಿ ಬುಧವಾರ ಭಾರತದಲ್ಲಿ ಸುಧಾರಿತ ಕೃತಕ ಬುದ್ಧಿಮತ್ತೆ (ಎಐ) ವೈಶಿಷ್ಟ್ಯಗಳನ್ನು ಹೊಂದಿರುವ ಎನ್ವಿ ಎಕ್ಸ್ 360 14 ಲ್ಯಾಪ್ ಟಾಪ್ಗಳನ್ನು (Envy x360 14) ಬಿಡುಗಡೆ ಮಾಡಿದೆ. ವಿಶೇಷವಾಗಿ ಕಂಟೆಂಟ್ ಕ್ರಿಯೇಟರ್ಗಳ ಸಮುದಾಯವನ್ನು ಗಮನದಲ್ಲಿರಿಸಿಕೊಂಡು ಈ ಲ್ಯಾಪ್ಟಾಪ್ಗಳನ್ನು ತಯಾರಿಸಲಾಗಿದೆ.
ಈ ಹೊಸ ಲ್ಯಾಪ್ಟಾಪ್ಗಳ ಕೀಬೋರ್ಡ್ನಲ್ಲಿ ಮೈಕ್ರೋಸಾಫ್ಟ್ ಕೋಪೈಲಟ್ ಬಟನ್ ನೀಡಲಾಗಿದೆ. ಇದು ಅಸಿಸ್ಟೆಡ್ ಸರ್ಚ್, ಕಂಟೆಂಟ್ ತಯಾರಿಕೆ ಸೇರಿದಂತೆ ಇನ್ನೂ ಹಲವಾರು ಕೆಲಸಗಳಿಗಾಗಿ ಎಐ ವೈಶಿಷ್ಟ್ಯಗಳನ್ನು ಸಕ್ರಿಯಗೊಳಿಸುತ್ತದೆ.
ಎಚ್ಪಿ ಎಕ್ಸ್ 360 14 ಲ್ಯಾಪ್ಟಾಪ್ ಮೆಟಿಯೋರ್ ಸಿಲ್ವರ್ ಮತ್ತು ಅಟ್ಮಾಸ್ಫಿಯರ್ ಬ್ಲೂ ಎಂಬ ಎರಡು ಬಣ್ಣಗಳಲ್ಲಿ ಲಭ್ಯವಿದೆ. 1.4 ಕೆಜಿ ತೂಕದ ಈ ಸಾಧನವು 14 ಇಂಚಿನ ಒಎಲ್ಇಡಿ ಟಚ್ ಡಿಸ್ ಪ್ಲೇ ಒಳಗೊಂಡಿದೆ ಮತ್ತು ಅಡೋಬ್ ಫೋಟೋಶಾಪ್ನಂತಹ ಅಪ್ಲಿಕೇಶನ್ಗಳೊಂದಿಗೆ ಉನ್ನತ ಮಟ್ಟದ ಕಂಟೆಂಟ್ ಕ್ರಿಯೇಟ್ ಮಾಡಲು ಅನುಕೂಲವಾಗುವಂತೆ ಇಂಟೆಲ್ ಕೋರ್ ಅಲ್ಟ್ರಾ ಪ್ರೊಸೆಸರ್ಗಳನ್ನು ಹೊಂದಿದೆ ಎಂದು ಕಂಪನಿ ಹೇಳಿಕೆಯಲ್ಲಿ ತಿಳಿಸಿದೆ.
"ಈ ಲ್ಯಾಪ್ಟಾಪ್ಗಳು ನ್ಯೂರಲ್ ಪ್ರೊಸೆಸಿಂಗ್ ಯುನಿಟ್ (ಎನ್ಪಿಯು) ಹೊಂದಿದ್ದು, ಇದು ನಿರಂತರ ಸೃಜನಶೀಲತೆ ಮತ್ತು ಉತ್ಪಾದಕತೆಗಾಗಿ ಬ್ಯಾಟರಿ ಆಪ್ಟಿಮೈಸೇಶನ್ಗೆ ಶೇಕಡಾ 65 ರಷ್ಟು ಸಹಾಯ ಮಾಡುತ್ತದೆ" ಎಂದು ಕಂಪನಿ ಹೇಳಿದೆ.
ಎಚ್ಪಿ ಎಕ್ಸ್ 360 14 ಲ್ಯಾಪ್ಟಾಪ್ಗಳು ಉತ್ತಮ ವೀಡಿಯೊ ವೈಶಿಷ್ಟ್ಯಗಳಿಗಾಗಿ ವಿಂಡೋಸ್ ಸ್ಟುಡಿಯೋ ಎಫೆಕ್ಟ್ಗಳನ್ನು ಹೊಂದಿವೆ. ಸ್ಕ್ರೀನ್ ಮೇಲೆ ಚಲಿಸುತ್ತಿದ್ದಂತೆ ಚಿತ್ರವನ್ನು ಸ್ವಯಂಚಾಲಿತವಾಗಿ ಜೂಮ್ ಮಾಡುವುದು ಮತ್ತು ಕ್ರಾಪ್ ಮಾಡುವಂತಹ ಎಐ ಆಧಾರಿತ ವೈಶಿಷ್ಟ್ಯಗಳನ್ನು ಇದು ನೀಡುತ್ತದೆ.
ಈ ಸಾಧನವು 14 ಗಂಟೆಗಳಿಗಿಂತ ಹೆಚ್ಚು ಬ್ಯಾಟರಿ ಬಾಳಿಕೆ, ವೈ-ಫೈ 7 ನೊಂದಿಗೆ ವೇಗದ ಸಂಪರ್ಕ ಹೊಂದಿದ್ದು, ಶಕ್ತಿಯುತ ಕಾರ್ಯಕ್ಷಮತೆಗಾಗಿ ಸುಧಾರಿತ ಥರ್ಮಲ್ ತಂತ್ರಜ್ಞಾನವನ್ನು ಒಳಗೊಂಡಿದೆ ಎಂದು ಕಂಪನಿ ತಿಳಿಸಿದೆ. ಎನ್ವಿ ಎಕ್ಸ್ 360 14 ಲ್ಯಾಪ್ ಟಾಪ್ಗಳು 99,999 ರೂಪಾಯಿಗಳ ಆರಂಭಿಕ ಬೆಲೆಯಲ್ಲಿ ಲಭ್ಯವಿವೆ.
ಹ್ಯೂಲೆಟ್ ಪ್ಯಾಕರ್ಡ್ (ಎಚ್ಪಿ) ಇದೊಂದು ದೊಡ್ಡ ಸಮೂಹ ಕಂಪನಿಯಾಗಿದ್ದು, ಹಲವಾರು ರೀತಿಯ ಎಲೆಕ್ಟ್ರಾನಿಕ್ ಸಾಧನಗಳನ್ನು ಉತ್ಪಾದಿಸುತ್ತದೆ. ಮುಖ್ಯವಾಗಿ ಇದು ಲ್ಯಾಪ್ಟಾಪ್ ಮತ್ತು ಪ್ರಿಂಟರ್ ತಯಾರಿಕೆಗೆ ಹೆಸರಾಗಿದೆ. ಇದು ಅಮೆರಿಕದ ಕ್ಯಾಲಿಫೋರ್ನಿಯಾದಲ್ಲಿ ಪ್ರಧಾನ ಕಚೇರಿಯನ್ನು ಹೊಂದಿದೆ.
ಇದನ್ನೂ ಓದಿ : ಫೆಬ್ರವರಿಯಲ್ಲಿ ಫೇಸ್ಬುಕ್ & ಇನ್ಸ್ಟಾದಲ್ಲಿನ 18 ಮಿಲಿಯನ್ ಪೋಸ್ಟ್ ತೆಗೆದು ಹಾಕಿದ ಮೆಟಾ - Meta
