ನವದೆಹಲಿ: ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್ಡಿಒ)ಯು ತಾನು ತಯಾರಿಸಿದ ಮಧ್ಯಮ ಶ್ರೇಣಿ-ಮೈಕ್ರೋವೇವ್ ಅಬ್ಸ್ಕೂರಂಟ್ ಚಾಫ್ ರಾಕೆಟ್ (ಎಂಆರ್-ಎಂಒಸಿಆರ್) (Medium Range-Microwave Obscurant Chaff Rocket -MR-MOCR) ಅನ್ನು ಭಾರತೀಯ ನೌಕಾಪಡೆಗೆ ಹಸ್ತಾಂತರಿಸಿತು. ಬುಧವಾರ ನವದೆಹಲಿಯಲ್ಲಿ ಸಮಾರಂಭ ನಡೆಯಿತು.
ಜೋಧಪುರದ ಡಿಆರ್ಡಿಒದ ರಕ್ಷಣಾ ಪ್ರಯೋಗಾಲಯವು ಅಭಿವೃದ್ಧಿಪಡಿಸಿದ ತಂತ್ರಜ್ಞಾನವಾದ ಮೈಕ್ರೋವೇವ್ ಅಬ್ಸ್ಕೂರಂಟ್ ಚಾಫ್ (ಎಂಒಸಿ) ರಾಡಾರ್ ಸಂಕೇತಗಳನ್ನು ದುರ್ಬಲಗೊಳಿಸುತ್ತದೆ ಮತ್ತು ಆ ಮೂಲಕ ಪ್ಲಾಟ್ ಫಾರ್ಮ್ಗಳು ಮತ್ತು ಪ್ರಮುಖ ಜಾಗಗಳ ಸುತ್ತಲೂ ಮೈಕ್ರೋವೇವ್ ಕವಚವನ್ನು ರಚಿಸುತ್ತದೆ. ಇದು ರಾಡಾರ್ ಮೂಲಕ ಪತ್ತೆಹಚ್ಚುವಿಕೆಯ ಸಂಭಾವ್ಯತೆಗಳನ್ನು ಕಡಿಮೆ ಮಾಡುತ್ತದೆ.
ಸಣ್ಣ ಗಾತ್ರದ ಮೈಕ್ರಾನ್ ವ್ಯಾಸ ಮತ್ತು ವಿಶಿಷ್ಟ ಮೈಕ್ರೋವೇವ್ ಅಸ್ಪಷ್ಟ ಗುಣಲಕ್ಷಣಗಳನ್ನು ಹೊಂದಿರುವ ವಿಶೇಷ ರೀತಿಯ ನಾರುಗಳನ್ನು ಮಧ್ಯಮ ಶ್ರೇಣಿಯ ಚಾಫ್ ರಾಕೆಟ್ನಲ್ಲಿ ಜೋಡಿಸಲಾಗಿದೆ. ರಾಕೆಟ್ ಅನ್ನು ಹಾರಿಸಿದಾಗ, ಅದು ಬಾಹ್ಯಾಕಾಶದಲ್ಲಿ ಮೈಕ್ರೋವೇವ್ ತಡೆ ಮೋಡವನ್ನು ರೂಪಿಸುತ್ತದೆ. ಸಾಕಷ್ಟು ನಿರಂತರ ಸಮಯದವರೆಗೆ ಕೆಲಸ ಮಾಡುವ ಇದು ರಾಡಾರ್ ಮೂಲಕ ನಮ್ಮನ್ನು ಪತ್ತೆ ಮಾಡಲು ಯತ್ನಿಸುವ ವೈರಿಗಳ ರೇಡಿಯೋ ಆವರ್ತನಗಳನ್ನು ತಡೆದು ಪರಿಣಾಮಕಾರಿ ರಕ್ಷಾಕವಚವನ್ನು ಸೃಷ್ಟಿಸುತ್ತದೆ.
ಎಂಆರ್-ಎಂಒಸಿಆರ್ನ ಮೊದಲ ಹಂತದ ಪ್ರಯೋಗಗಳನ್ನು ಭಾರತೀಯ ನೌಕಾಪಡೆಯ ಹಡಗುಗಳಲ್ಲಿ ಯಶಸ್ವಿಯಾಗಿ ನಡೆಸಲಾಗಿದೆ. ಇದು ಎಂಒಸಿ ಮೋಡ ಸೃಷ್ಟಿಯಾಗುವುದು ಮತ್ತು ಬಾಹ್ಯಾಕಾಶದಲ್ಲಿ ನಿರಂತರವಾಗಿರುವುದನ್ನು ಪ್ರದರ್ಶಿಸಿತು. ಎರಡನೇ ಹಂತದ ಪ್ರಯೋಗಗಳಲ್ಲಿ, ವೈಮಾನಿಕ ಗುರಿಯನ್ನು ಶೇಕಡಾ 90 ರಷ್ಟು ಕಡಿಮೆ ಮಾಡುವ ರಾಡಾರ್ ಕ್ರಾಸ್-ಸೆಕ್ಷನ್ (ಆರ್ಸಿಎಸ್) ಅನ್ನು ಭಾರತೀಯ ನೌಕಾಪಡೆಯು ಪ್ರದರ್ಶಿಸಿದೆ ಮತ್ತು ಪ್ರಮಾಣೀಕರಣಗೊಳಿಸಿದೆ.
ಎಲ್ಲಾ ಅರ್ಹತಾ ಅವಶ್ಯಕತೆಗಳನ್ನು ಪೂರೈಸುವ ಎಂಆರ್-ಎಂಒಸಿಆರ್ ಸಂಖ್ಯೆಯನ್ನು ಯಶಸ್ವಿಯಾಗಿ ಭಾರತೀಯ ನೌಕಾಪಡೆಗೆ ಹಸ್ತಾಂತರಿಸಲಾಗಿದೆ. ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಇಲಾಖೆಯ ಕಾರ್ಯದರ್ಶಿ ಮತ್ತು ಡಿಆರ್ ಡಿಒ ಅಧ್ಯಕ್ಷ ಡಾ.ಸಮೀರ್ ವಿ.ಕಾಮತ್ ಅವರು ಭಾರತೀಯ ನೌಕಾಪಡೆಯ ನೌಕಾ ಶಸ್ತ್ರಾಸ್ತ್ರ ತಪಾಸಣೆಯ ಮಹಾನಿರ್ದೇಶಕ ರಿಯರ್ ಅಡ್ಮಿರಲ್ ಬ್ರಿಜೇಶ್ ವಶಿಷ್ಠ ಅವರಿಗೆ ಎಂಆರ್-ಎಂಒಸಿಆರ್ ಅನ್ನು ಹಸ್ತಾಂತರಿಸಿದರು.
ಈ ಮಹತ್ವದ ಸಾಧನೆಗಾಗಿ ಜೋಧಪುರದ ರಕ್ಷಣಾ ಪ್ರಯೋಗಾಲಯ ತಂಡವನ್ನು ಡಿಆರ್ಡಿಒ ಅಧ್ಯಕ್ಷರು ಅಭಿನಂದಿಸಿದರು. ಭಾರತೀಯ ನೌಕಾಪಡೆಯ ನೌಕಾ ಶಸ್ತ್ರಾಸ್ತ್ರ ತಪಾಸಣೆಯ ಮಹಾನಿರ್ದೇಶಕರು, ಈ ಮಹತ್ವದ ತಂತ್ರಜ್ಞಾನವನ್ನು ಅಲ್ಪಾವಧಿಯಲ್ಲಿ ದೇಶೀಯವಾಗಿ ಅಭಿವೃದ್ಧಿಪಡಿಸಿದ ಡಿಆರ್ಡಿಒ ದ ಪ್ರಯತ್ನಗಳನ್ನು ಶ್ಲಾಘಿಸಿದರು.
