Be Careful About Online Shopping: ಅವಸರವೇ ಅಪಾಯಕ್ಕೆ ಕಾರಣ ಎಂಬ ಗಾದೆ ಮಾತಿದೆ. ಆನ್ಲೈನ್ ಶಾಪಿಂಗ್ ವಿಚಾರದಲ್ಲೂ ಇದು ಅನ್ವಯ. ಹೌದು, ಸ್ವಲ್ಪ ಯಾಮಾರಿದ್ರೂ ಸಾಕು ನಮ್ಮ ಹಣ ಮಂಗಮಾಯವಾಗುತ್ತದೆ. ಇಂತಹ ಸಂದರ್ಭಗಳಲ್ಲಿ ಯಾವೆಲ್ಲ ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳಬೇಕು ಎಂಬುದರ ಕುರಿತು Bankbazaar.com ಕೆಲವು ಸಲಹೆಗಳನ್ನು ನೀಡಿದೆ.
ಆಫರ್ ಆಸೆ: ಹಬ್ಬಗಳು ಮತ್ತು ಇತರ ಪ್ರಮುಖ ಸಂದರ್ಭಗಳಲ್ಲಿ ರಿಯಾಯಿತಿಗಳು ಎಲ್ಲೆಡೆ ಇರುತ್ತವೆ. ಈ ಕುರಿತು ಇಮೇಲ್‌ಗಳು ಮತ್ತು ಫೋನ್ಗಳಿಗೆ ಸಂದೇಶಗಳು ಬರುತ್ತವೆ. ಉದಾಹರಣೆಗೆ, ಪ್ರಮುಖ ಇ-ಕಾಮರ್ಸ್ ಕಂಪನಿಯಲ್ಲಿ ವಿಶೇಷ ರಿಯಾಯಿತಿಯನ್ನು ನೀಡುವ ಇ-ಮೇಲ್ ಅನ್ನು ವ್ಯಕ್ತಿಯೊಬ್ಬರು ಸ್ವೀಕರಿಸಿದ್ದರು. ಆ ಸಂದೇಶದಲ್ಲಿ 'ಈ ಆಫರ್ ಕೇವಲ ಎರಡು ಗಂಟೆಗಳವರೆಗೆ ಮಾತ್ರ ಲಭ್ಯ. ಮತ್ತು ಐಟಂಗಳು ಸೀಮಿತ' ಎಂದು ಬರೆಯಲಾಗಿತ್ತು. ಇದೊಂದು ಒಳ್ಳೆಯ ಅವಕಾಶವೆಂದು ಆ ವ್ಯಕ್ತಿ ಭಾವಿಸಿದ್ದರು. ಅದರಲ್ಲಿ ನಮೂದಿಸಿದ್ದ ಲಿಂಕ್ ತೆರೆದು ತನ್ನ ಕ್ರೆಡಿಟ್ ಕಾರ್ಡ್ ವಿವರಗಳನ್ನು ನೀಡಿದ್ದಾರೆ. ಆದರೆ, ಕಾರ್ಡ್‌ನಿಂದ ಹಣ ಹೋದ ನಂತರವಷ್ಟೇ ಅವರಿಗೆ ತಾನು ವಂಚನೆಗೊಳಗಾಗಿರುವುದು ಗೊತ್ತಾಗಿದೆ. ಖ್ಯಾತ ಕಂಪನಿಗಳು ಇಂತಹ ಯಾವುದೇ ಆಫರ್ಗಳನ್ನು ನೀಡುವುದಿಲ್ಲ ಎಂಬುದು ಅವರಿಗೆ ನಂತರ ಅರಿವಾಗಿದೆ.
ಈ ರೀತಿ ಎಚ್ಚರ ವಹಿಸಿ:
- ಸೀಮಿತ ಸಮಯದ ಕೊಡುಗೆಗಳ ಕುರಿತ ಇಮೇಲ್‌ಗಳು ಮತ್ತು ಸಂದೇಶಗಳ ಬಗ್ಗೆ ಎಚ್ಚರದಿಂದಿರಿ.
- ಯಾವುದೇ ಸಂದರ್ಭದಲ್ಲಿ ಇಮೇಲ್‌ನಲ್ಲಿರುವ ಲಿಂಕ್ ತೆರೆಯಬೇಡಿ. ಬದಲಿಗೆ ಆಯಾ ಸಂಸ್ಥೆಗಳ ಅಧಿಕೃತ ವೆಬ್‌ಸೈಟ್‌ಗಳಿಗೇ ಹೋಗಿ.
- ವಿಶೇಷವಾಗಿ, ಸೀಮಿತ ಸಮಯದ ಕೊಡುಗೆಗಳ ಸಂದೇಶಗಳನ್ನು ನಿರ್ಲಕ್ಷಿಸಿ.
- ಮೋಸದ ಇಮೇಲ್‌ಗಳು ಕಂಪನಿಯ ಹೆಸರುಗಳಲ್ಲಿ ಮುದ್ರಣದೋಷಗಳನ್ನು ಹೊಂದಿರುತ್ತವೆ. ಇವುಗಳನ್ನು ಸ್ವಲ್ಪ ಕಾಳಜಿಯಿಂದ ಗುರುತಿಸಬೇಕು ಅಷ್ಟೇ.
- ಪಾವತಿಗಳಿಗೆ ಬಂದಾಗ, ಎರಡು ಅಂಶದ ದೃಢೀಕರಣವನ್ನು ಬಳಸಬೇಕು. ಇದು ಹೆಚ್ಚುವರಿ ರಕ್ಷಣೆ ಒದಗಿಸುತ್ತದೆ.
- ಆಫರ್ಗಳನ್ನು ಎರಡು ಬಾರಿ ಪರಿಶೀಲಿಸಿದ ನಂತರವೇ ಖರೀದಿ ನಿರ್ಧಾರ ತೆಗೆದುಕೊಳ್ಳಬೇಕು. ಮೋಸ ಹೋಗಿರುವುದು ಕಂಡುಬಂದಲ್ಲಿ ಕೂಡಲೇ ಬ್ಯಾಂಕ್ ಹಾಗೂ ಸೈಬರ್ ಕ್ರೈಂ ಠಾಣೆಗೆ ದೂರು ನೀಡಿ.
ಈಗ ಹಬ್ಬದ ಸಂದರ್ಭ. ಸೈಬರ್ ಕಳ್ಳರು ತಂತ್ರಜ್ಞಾನದ ಮೂಲಕ ಹೊಸ ರೀತಿಯಲ್ಲಿ ಅಮಾಯಕರ ಹಣ ದೋಚಲು ಯತ್ನಿಸುತ್ತಾರೆ. ಹೀಗಾಗಿ ಆನ್ಲೈನ್ ಶಾಪಿಂಗ್ ಮಾಡುವ ಮುನ್ನ ಎಚ್ಚರ ವಹಿಸುವಂತೆ ಆಗಾಗ್ಗೆ ಪೊಲೀಸರು ಕೂಡಾ ಸೂಚನೆ ನೀಡುತ್ತಲೇ ಇರುತ್ತಾರೆ.
ಇದನ್ನೂ ಓದಿ: Vivo V40e ಸ್ಮಾರ್ಟ್‌ಫೋನ್‌ ಬಿಡುಗಡೆ: ಬೆಲೆ, ವಿಶೇಷತೆಗಳ ಸಂಪೂರ್ಣ ಮಾಹಿತಿ - Vivo V40e Launched
