ಕ್ಯಾಲಿಫೋರ್ನಿಯಾ(ಅಮೆರಿಕ): ಐಫೋನ್ ತಯಾರಕರು ಆಪರೇಟಿಂಗ್ ಸಿಸ್ಟಮ್ ಮಟ್ಟದಲ್ಲಿ OpenAI ಅನ್ನು ಸಂಯೋಜಿಸಿದರೆ ತನ್ನ ಕಂಪನಿಗಳಿಂದ ಎಲ್ಲ ಆ್ಯಪಲ್ ಸಾಧನಗಳನ್ನು ನಿಷೇಧಿಸುವುದಾಗಿ ಸಾಮಾಜಿಕ ಜಾಲತಾಣ ಎಕ್ಸ್ ಮಾಲೀಕ ಎಲೋನ್ ಮಸ್ಕ್ ಬೆದರಿಕೆ ಹಾಕಿದ್ದಾರೆ.
ಐಫೋನ್ ತಯಾರಕರು ಸೋಮವಾರ OpenAI ಜೊತೆ ಪಾಲುದಾರಿಕೆಯನ್ನು ಘೋಷಿಸಿದ ಬೆನ್ನಲ್ಲೇ ಟೆಸ್ಲಾ ಮತ್ತು ಸ್ಪೇಸ್ ಎಕ್ಸ್ನ ಸಿಇಒ ಎಲೋನ್ ಮಸ್ಕ್ ತಮ್ಮ ಸಾಮಾಜಿಕ ಜಾಲತಾಣ ಎಕ್ಸ್ನಲ್ಲಿ ಆ್ಯಪಲ್ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.
ಮಸ್ಕ್ ಎಕ್ಸ್ನಲ್ಲಿ ಸರಣಿ ಪೋಸ್ಟ್ಗಳನ್ನು ಮಾಡಿ, ಬಳಕೆದಾರರ ಮಾಹಿತಿಯ ರಕ್ಷಣೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ. ಎರಡು ಕಂಪನಿಗಳ ನಡುವಿನ ಒಪ್ಪಂದವನ್ನು "ಇದು ಸ್ವೀಕರಿಸಲು ಸಾಧ್ಯವಿಲ್ಲದ ಭದ್ರತಾ ಉಲ್ಲಂಘನೆ", "ಇದನ್ನು ನಾನು ಬಯಸುವುದಿಲ್ಲ" ಎಂದು ಹೇಳಿದ್ದಾರೆ.
"ಒಂದೋ ಈ ತೆವಳುವ ಸ್ಪೈವೇರ್ ಅನ್ನು ನಿಲ್ಲಿಸಿ, ಅಥವಾ ನನ್ನ ಕಂಪನಿಗಳ ಆವರಣದಿಂದ ಎಲ್ಲ ಆ್ಯಪಲ್ ಸಾಧನಗಳನ್ನು ನಿಷೇಧಿಸಲಾಗುವುದು" ಎಂದು ಮಸ್ಕ್, ಆ್ಯಪಲ್ ಸಿಇಒ ಟಿಮ್ ಕುಕ್ ಅವರ ಎಕ್ಸ್ ಪೋಸ್ಟ್ಗೆ ಪ್ರತಿಕ್ರಿಯೆ ನೀಡಿದ್ದಾರೆ.
ಕುಕ್, "iPhone, iPad, ಮತ್ತು Macಗೆ ಆ್ಯಪಲ್ ಇಂಟೆಲಿಜೆನ್ಸ್ ಅನ್ನು ಪರಿಚಯಿಸುತ್ತಿದ್ದೇವೆ. AI ನಲ್ಲಿ ನಮ್ಮ ಮುಂದಿನ ಅಧ್ಯಾಯ. ಇದು ವೈಯಕ್ತಿಕ, ಶಕ್ತಿಯುತ ಮತ್ತು ಖಾಸಗಿ- ಮತ್ತು ಇದನ್ನು ನೀವು ಪ್ರತಿದಿನ ಬಳಸುವಂತಹ ಅಪ್ಲಿಕೇಶನ್ಗಳಲ್ಲಿ ಸಂಯೋಜಿಸಲಾಗಿದೆ" ಎಂದು ಎಕ್ಸ್ ಪೋಸ್ಟ್ನಲ್ಲಿ ಹೇಳಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಎಲೊನ್ ಮಸ್ಕ್, ತಮ್ಮ ಕಂಪನಿಗಳಲ್ಲಿ ಎಲ್ಲಾ ಆ್ಯಪಲ್ ಸಾಧನಗಳನ್ನು ನಿಷೇಧಿಸಲಾಗುವುದು ಎಂದು ಎಚ್ಚರಿಕೆ ನೀಡಿದ್ದಾರೆ.
ಟೆಕ್ ದೈತ್ಯ ಆ್ಯಪಲ್ ಸೋಮವಾರ ಐಫೋನ್, ಐಪ್ಯಾಡ್ ಮತ್ತು ಮ್ಯಾಕ್‌ಗಾಗಿ ವೈಯಕ್ತಿಕ ಗುಪ್ತಚರ ವ್ಯವಸ್ಥೆಯಾದ 'ಆ್ಯಪಲ್ ಇಂಟೆಲಿಜೆನ್ಸ್' ಅನ್ನು ಪರಿಚಯಿಸಿತು. iOS 18, iPadOS 18, ಮತ್ತು macOS Sequoia ಗೆ Apple Intelligence ಅನ್ನು ಆಳವಾಗಿ ಸಂಯೋಜಿಸಲಾಗಿದೆ.
ಭಾಷೆ ಮತ್ತು ಚಿತ್ರಗಳನ್ನು ಅರ್ಥಮಾಡಿಕೊಳ್ಳಲು ಮತ್ತು ರಚಿಸಲು, ಅಪ್ಲಿಕೇಶನ್‌ಗಳಾದ್ಯಂತ ಕ್ರಮ ತೆಗೆದುಕೊಳ್ಳಲು ಮತ್ತು ದೈನಂದಿನ ಕಾರ್ಯಗಳನ್ನು ಸರಳಗೊಳಿಸಲು ಮತ್ತು ವೇಗಗೊಳಿಸಲು ಆ್ಯಪಲ್ ಸಿಲಿಕಾನ್‌ನ ಶಕ್ತಿಯನ್ನು ಬಳಸಿಕೊಳ್ಳುತ್ತದೆ.
AI ಅಳವಡಿಕೆಯ ಭದ್ರತೆ ಮತ್ತು ಗೌಪ್ಯತೆಯ ಬಗ್ಗೆ ಪ್ರಶ್ನೆಗಳನ್ನು ಎನ್ನುವ ಮಸ್ಕ್, "ಆ್ಯಪಲ್ ತನ್ನದೇ ಆದ AI ಅನ್ನು ತಯಾರಿಸಲು ಸಾಕಷ್ಟು ಸ್ಮಾರ್ಟ್ ಆಗಿಲ್ಲ. ಆದರೆ OpenAI ನಿಮ್ಮ ಸುರಕ್ಷತೆ ಮತ್ತು ಗೌಪ್ಯತೆಯನ್ನು ರಕ್ಷಿಸುತ್ತದೆ ಎಂದು ಖಚಿತಪಡಿಸಿಕೊಳ್ಳಲು ಸಮರ್ಥವಾಗಿದೆ ಎಂಬುದು ಅಸಂಬದ್ಧವಾಗಿದೆ!" ಎಂದು ಕೆಣಕಿದ್ದಾರೆ.
"ನಿಮ್ಮ ಡೇಟಾವನ್ನು ಓಪನ್‌ಎಐಗೆ ಹಸ್ತಾಂತರಿಸಿದ ನಂತರ ನಿಜವಾಗಿ ಏನಾಗುತ್ತದೆ ಎಂಬುದರ ಬಗ್ಗೆ ಆಪಲ್ಗೆ ಯಾವುದೇ ಸುಳಿವು ಇಲ್ಲ. ಅವರ ವೈಯಕ್ತಿಕ ಲಾಭಕ್ಕಾಗಿ ನಿಮಗೆ ಮೋಸ ಮಾಡುತ್ತಿದ್ದಾರೆ" ಎಂದು ಟೆಸ್ಲಾ ಸಿಇಒ ಎಕ್ಸ್ನಲ್ಲಿ ಜರಿದಿದ್ದಾರೆ.
